Margiela -ში გაგზავნილი პიცის ყუთი დემნასგან და დიდი აღიარება: „არასდროს ვყოფილვარ “sassy fashion boy” - დემნა გვასალია

Margiela და პიცის ყუთი... როგორ მოხვდა მსოფლიოს მაღალი მოდის სამყაროში, დღეს უკვე ას ყველაზე გავლენიან ადამიანთა სიაში მყოფი და Gucci -ს კრეატიული დირექტორი, ქართველი დემნა გვასალია, ოკუპირებულ სოხუმში დაბადებული, დევნილი, რომელის პირველი იდეა მოდის სამყაროში შეღწევისთვის პიცის ყუთსა და Margiela-ს უკავშირდება. 2017 წელს ამერიკის მოდის დიზაინერთა საბჭომ (CFDA) პრემიით მოდის "ოსკარით" დააჯილდოვა. დემნა გვასალიას დამთავრებული აქვს თბილისის სახელმწიფო უნივერსიტეტის საერთაშორისო ეკონომიკის ფაკულტეტი. 2015 წლიდან ფრანგული მოდის სახლის "ბალენსიაგას" შემოქმედებითი დირექტორი და კომპანია "ვეტმანის" მთავარი დიზაინერია, მისი სამოსით სარგებლობენ რიანა, კიმ კარდაშიანი, სელენა გომესი, ჯიჯი ჰადიდი... აშშ-ის ყოფილი პირველი ლედი მიშელ ობამა სერიალის "სექსი დიდ ქალაქში" ვარსკვლავთან, სარა ჯესიკა პარკერთან გადაცემაში სწორედ დემნა გვასალიას ყვითელი სამოსით წარდგა. დემნა, Gucci -ს კრეატიული დირექტორი, იხსენებს, თუ როგორ დაიწყო პარიზში პირველი სამსახური: „პარიზში, ნიუ-იორკში და მილანში 90 პორტფოლიო გავგზავნე და არ ამიყვანეს. უკვე ვფიქრობდი, რომ ამ ინდუსტრიაში სამსახურს ვერ დავიწყებდი. მე არ ვიყავი სოციალური ხალხთან ურთიერთობაში, არასდროს ვყოფილვარ “sassy fashion boy” რომელიც მოდის კვირეულებზე დადის. ბოლოს გადავწყვიტე, რომ პორტფოლიო Margiela -ში გამეგზავნა. შეიძლება ეს ჩემი, როგორც ეკონომისტის, ტვინის დამსახურებაა, მაგრამ ვიფიქრე - პორტფოლიო უნდა გახსნან, შეფუთვა არის მნიშვნელოვანი. პორტფოლიო პიცის ყუთში ჩავდე და გავგზავნე. ასე მივიქციე მათი ყურადღება. დამირეკეს და მითხრეს - შეძლებ, რომ 10 დღეში პარიზში ჩამოხვიდე? 3 თვე პარიზში მეგობრის ბინაში დივანზე მეძინა, მაგრამ ამას რა მნიშვნელობა ჰქონდა, მთავარი იყო, რომ პარიზში ჩემთვის კარი გაიღო.“