ქანიე უესთის კონცერტის ფინანსები გასაიდუმლოებულია - ანგარიშსწორება კვლავ მიმდინარე პროცესშია

საქართველოში ამერიკელი რეპერისა და პროდიუსერის, ქანიე უესთის კონცერტის გარშემო ფინანსური კითხვები კვლავ პასუხგაუცემელი რჩება. საქართველოს პარლამენტის წევრის, ვიკა ფილფანის ოფიციალურ მოთხოვნას კონცერტის ხარჯებისა და შემოსავლების გასაჯაროების შესახებ, კულტურის სამინისტრომ და ღონისძიების ორგანიზატორმა სახელმწიფო კომპანიამ კონფიდენციალურობის მოტივით აუარეს გვერდი.

საქართველოს პარლამენტის წევრმა ვიკა ფილფანმა კულტურის სამინისტროს სადეპუტატო კითხვით მიმართა, სადაც კონსტიტუციისა და პარლამენტის რეგლამენტის საფუძველზე, სახელმწიფო შპს „სთარინგ ჯორჯიას“ მიერ ორგანიზებული ქანიე უესთის კონცერტის დეტალური ფინანსური ანგარიშგება მოითხოვა.

დეპუტატის ინტერესის საგანს წარმოადგენდა:

• ბილეთების რეალიზაციიდან მიღებული ზუსტი შემოსავალი;

• სპონსორების ვინაობა და მათ მიერ გაღებული ფინანსური კონტრიბუცია;

• შემოსავლებიდან უშუალოდ შემსრულებლისთვის, ქანიე უესთისთვის გადახდილი ჰონორარის მოცულობა (მილიონ ლარებში);

• ღონისძიების ჯამური ხარჯი და მიღებული მოგება/ზარალი.

საქართველოს კულტურის მინისტრმა, თინათინ რუხაძემ დეპუტატის წერილს თავად კომპანია „სთარინგ ჯორჯიას“ დირექტორის, თამარ ჩხაიძის ოფიციალური პასუხი დაურთო, რომლის მიხედვითაც, მოთხოვნილი ინფორმაცია საჯარო არ გახდება.

კომპანიის ხელმძღვანელობა განმარტავს, რომ როგორც თავად არტისტთან (ქანიე უესთთან), ისე გენერალურ სპონსორთან გაფორმებული ხელშეკრულებები შეიცავს კონფიდენციალურობის მკაცრ ვალდებულებას, რის გამოც სახელმწიფო კომპანია მოკლებულია შესაძლებლობას, ეს მონაცემები პარლამენტარს მიაწოდოს.

ამასთანავე, „სთარინგ ჯორჯია“ აღნიშნავს, რომ პროექტის ჯამური ბიუჯეტის დასახელება ამ ეტაპზე შეუძლებელია, ვინაიდან ღონისძიების ორგანიზებასთან დაკავშირებული რიგი ფინანსური და სახელშეკრულებო ვალდებულებების შესრულება და ანგარიშსწორება კვლავ მიმდინარე პროცესია. კომპანიის განცხადებით, საბოლოო ციფრები მხოლოდ ყველა ნაკისრი ვალდებულების სრულად დახურვის შემდეგ დაზუსტდება.