„ბევრმა იკითხა და გიპასუხებთ, გარდაცვლილია 4 თვის ანდრია კაპანაძე… სისხლს რომ გაგიყინავს, ისეთი ამბავია… მადლობა ყველას, თანხა ავაგროვეთ!…“ – სანდრო ელოშვილი

რეჟისორმა სანდრო ელოშვილმა გუშინ საკუთარ ფეისბუკგვერდზე გაავრცელა საქველმოქმედო განცხადება, რომელშიც მოქალაქეებს, სოფელ მანავში ხანძრის შედეგად დაღუპული მცირეწლოვნის ოჯახის დახმარების თხოვნით მიმართავდა.

„ჩვენთან, საქართველოში, ერთ ოჯახში ოთხი თვის წინ, ხუთი წლის ანასტასია ავარიაში მოყვა და ანგელოზებთან გაფრინდა ცაში. ის სიკეთე და სიყვარული რაც თან წაიღო დედამიწიდან, რამდენიმე დღეში ოჯახს მისი პატარა ძამიკოს, ანდრიას დაბადებით დაუბრუნდა.

ორი დღის წინ კი სოფელ მანავში ხანძარი გაჩნდა და… დაიკოსთან გაფრინდა პატარა ანდრიაც.

ოჯახს გადასვენების სახსრებიც კი არ ჰქონდა და გუშინ შეაგროვა ხალხმა… უკვე ჭიათურაშია დასვენებული.

მეგობრები მესაუბრნენ და მომიყვნენ, სისხლს რომ გაგიყინავს, ისეთი ამბავია…

უზომოდ გაჭირვებული ოჯახია, მანამდე ბაბუამ ვერ გაუძლო ოჯახის ასეთ ყოფას და თავი მოიკლა, ორი ანგელოზი ახლა ცაში გაფრინდა, სახლიც დაეწვათ…

ტკივილს ტკივილი ემატება, სიმწარეს სიმწარე… რომ არ მსმენია და მეტი მსგავსი ამბავი მტერზეც რომ არ მინდა გავიგო, ისეთია! ბებიამ, რომელსაც თვითონაც ჯანმრთელობის სერიოზული პრობლემები აქვს, ვესაუბრე და ვუთხარი, რომ აუცილებლად მოგიყვებოდით ამ ამბავს და რასაც შევძლებდით, ცოტათი მაინც შევუმსუბუქებდით ასეთ მდგომარეობას…

გევედრებით, გააზიარეთ რა!

თუ ვინმეს რამე შეგვიძლია, მცირედი რომ გავიღოთ ამ ოჯახისთვის… ხვალ ყოფილა ბავშვის დაკრძალვა, რაც მოგროვდება ხვალ დილამდე… გადავცემ ოჯახის ახლობელს…“
როგორც ირკვევა, თანხის მობილიზება მცირე დროში მოხერხდა, რის გამოც სანდრო ელოშვილი მოქალაქეებს მადლობას უხდის.

„მადლობა ყველას

თანხა ავაგროვეთ.

ანგარიშები ავიღე, რომ აღარ ჩარიცხოთ!

გაიხარეთ! პოსტს დავტოვებ…

მეგობრებო, ბევრმა იკითხა და აქაც გიპასუხებთ. გარდაცვლილია 4 თვის ანდრია კაპანაძე, მე ოჯახს არ ვიცნობ, ვიცნობ ქალბატონ ნონას და მაკას, რომლებიც ეს დღეები ცდილობენ გვერდში დაადგნენ ოჯახს… ბავშვის ბებია, თამარ აბესაძეა, რომლის ანგარიშიც დაყადაღებულია, ამიტომაც მაქვს მითითებული ჩემი ანგარიში“