"ჭკვიანური სახით არგუმენტის მოტანა, რომ ინგლისში და სხვაგანაც ბავშვები სკოლებში ფორმებით დადიან და ამიტომ ეს სწორია, ჩვეულებრივი სისულელეა ჩემს თვალში..."- ტორესა მოსი ლადო ბურდულზე

მწერალი ტორესა მოსი  გადაცემა "ჩატში" ლადო ბურდულსა და მარიამ გულედანს შორის წარმოშობილ კამათს ეხმიანება სკოლის ფორმებთან და ზოგადად, ახალგაზრდების თავისუფლებასთან დაკავშირებით და წერს:

"რამდენიმე დღეა ვუყურებ დისკუსიას და არ შემიძლია არ ვთქვა. სკოლის სავალდებულო ფორმები ინგლისშიც, ამერიკაშიც, საფრანგეთშიც, საქართველოშიც და ყველგან, სადაც ის გამოიყენება, ბავშვებზე ძალადობის ერთ-ერთი ინსტრუმენტია. სკოლა ინგლისშიც, ამერიკაშიც, საქართველოშიც და ძირითადად ყველგან, ძალადობრივი ინსტიტუციაა, რომლის მიზანი არ არის ბავშვისთვის ცოდნის მიცემა, უფრო სწორად ეგ მეორეული მიზანია, მთავარი მიზანი არის ბავშვის, როგორც ინდივიდის, მისი მისწრაფებების, მისი სურვილების, ოცნებების, ინდივიდუალობის განადგურება.

მესმის, რომ ცუდად ჟღერს რასაც ვამბობ, მაგრამ არსებითად, სკოლების რეფორმა მსოფლიოში თითქმის არსად ჩატარებულა და ყველგან სკოლები ძირითადად ძალადობრივია, ამიტომ ჭკვიანური სახით არგუმენტის მოტანა, რომ ინგლისში და სხვაგანაც ბავშვები სკოლებში ფორმებით დადიან და ამიტომ ეს სწორია, ჩვეულებრივი სისულელეა ჩემს თვალში. ადამიანებზე ძალადობა ინგლისშიც ისეთივე პრობლემაა, როგორც საქართველოში და მოზამბიკში. და კი, როდესაც გაიძულებენ რაღაც საკუთარი ნების წინააღმდეგ ჩაიცვა, არის ძალადობა, თუ ეს არ უკავშირდება უსაფრთხოებას. მაგალითად ქარხანაში, ან მშენებლობაზე სპეციალური ფორმა გამართლებული შეიძლება იყოს უსაფრთხოების საჭიროებიდან და არა მენეჯერის ახირებიდან. მაგალითად ბანკში დრესკოდი არის ბანკის თანამშრომლებზე ძალადობა. იმის გამო, რომ ეს ძალადობა ნორმალიზებულია, არ ნიშნავს, რომ ეს სწორია. სწორი კი გვეჩვენება იმიტომ, რომ სკოლიდან გვაგუებენ აზრს, რომ ძალადობა ნორმალურია და ასეც უნდა იყოს.

მოკლედ, ბავშვებზე ძალადობა, სამწუხაროდ, მსოფლიოს უდიდეს ნაწილში, მათ შორის განვითარებულ ქვეყნებშიც, სერიოზულ გამოწვევად რჩება კაცობრიობისთვის. განვითარებულ ქვეყნებში ამ ძალადობას უკეთ ფუთავენ და აპრიალებენ, მაგრამ სამწუხაროდ, გერმანიაშიც, ინგლისშიც, ამერიკაშიც, საფრანგეთშიც, ავსტრიაშიც და ძირითადად ყველგან, ძალიან იშვიათი და ერთეული კონკრეტული გამონაკლისების მიუხედავად, კონკრეტული სკოლების დონეზე, საგანმანათლებლო სისტემა, თავისი არსით ძალადობრივია" , - წერს ტორესა.