„კარგია, რომ მთელი 16 წლის შემდეგ, "ქართული ოცნება" აგვისტოს ომის ირგვლივ გამოძიებაზე იწყებს საუბარს“ - ირმა ინაშვილი

„პატრიოტთა ალიანსის“ ერთ-ერთი ლიდერი ირმა ინაშვილი სოცქსელში წერს:

დილით მუხათგვერდის ძმათა სასაფლაოზე ვიყავი... სათითაოდ მივაგეთ პატივი ჩვენს სასახელო გმირებს, ჩვენს შვილებს, ძმებს. ჩვენმა საყვარელმა მამა დავით ლონდარიძემ აღასრულა პანაშვიდი. დაღუპული გმირების საფლავებთან ოჯახის წევრები ჩუმად იდგნენ. სწორედ ამ ჩუმმა და პატიოსანმა ოჯახებმა აღუზარდა სამშობლოს ეს თავდადებული ხალხი. სწორედ ამ წესიერმა და ქართულმა ოჯახებმა შთაუნერგა საკუთარ შვილებს, რომ ბედნიერია ის, ვისაც სამშობლოსათვის უძგერს გული და ბედნიერია ის, ვინც სიცოცხლეს სამშობლოსათვის გაწირავს. გადახედავთ ამ მემორიალურ დაფებს და აღმოაჩენთ 1978 წელს დაბადებულ ვაჟკაცებს. ქალბატონმა მზიამ მიამბო, რომ მეუღლე აფხაზეთის ომში, ხოლო შვილი აგვისტოს ომში დაეღუპა... რა დასკვნა უნდა გამოვიტანოთ ჩვენ? აღარასდროს უნდა დავუშვათ, რომ საქართველოში ოდესმე ახალი აგვისტოს ომი განმეორდეს. ამაში წვლილი ხელისუფლებამ, ოპოზიციამ და ზოგადად, საზოგადოებამ ერთად უნდა შევიტანოთ...16 წელი გავიდა აგვისტოს ომიდან. 16 წელია პირადად მე ვითხოვ,- მოხდეს გამოძიება, რა ღალატთან გვქონდა საქმე, როგორ გააჩუქეს კოდორი და ახალგორი, როგორ მიატოვეს ფრონტის ხაზზე ჯარისკაცები, რატომ არ მოხდა მშვიდობიანი მოსახლეობის ევაკუაცია. კარგია, რომ მთელი 16 წლის შემდეგ, "ქართული ოცნება" აგვისტოს ომის ირგვლივ გამოძიებაზე იწყებს საუბარს... არჩევნების შემდეგ, ომის დანაშაულებებს გამოვიძიებთო... რაზეც ჩვენი პარტია 2012 წლის შემდეგ ლაპარაკობდა, რასაც ჩვენ ვითხოვდით, რისთვისაც ჩვენ ვიბრძოდით და რის გამოც, ათას იარლიყს გვაკერებდნენ, ყველა აზრი, პოზიცია, მოთხოვნა სწორი და სამართლიანი იყო... დრომ დაადასტურა ეს! დრო გვაჩვენებს იმასაც, რომ, ღმერთმა არ ქნას, თუ ჩვენს სამშობლოს რაიმე დაემუქრება, პირველები ისევ მე და მახაჩა ვიდგებით წინა ხაზზე და გარწმუნებთ, ნამდვილად არ დამენანება სიცოცხლე საქართველოს დასაცავად. არც აქამდე დამნანებია...