„ოცნება“ განზრახ წავიდა ესკალაციაზე. ჩვენი დასჯის გარდა, უფრო დიდი მოტივი ამოძრავებს - ძალით უნდა არალეგიტიმური ძალაუფლების შენარჩუნება. და თან სასწრაფოდ, რადგან თუ აცდის საზოგადოებას, ჩვენ ორგანიზებას მოვასწრებთ“ - პაატა ციკოლია

„ქართული ოცნება განზრახ წავიდა ესკალაციაზე. ჩვენი დასჯის გარდა უფრო დიდი მოტივი ამოძრავებს - ძალით უნდა არალეგიტიმური ძალაუფლების შენარჩუნება. და თან სასწრაფოდ, რადგან თუ აცდის საზოგადოებას, ჩვენ ორგანიზებას მოვასწრებთ.არალეგიტიმური რომაა, ეს საზოგადოების უმრავლესობამ ისედაც ვიცით. პრეზიდენტმაც გვითხრა, რომ კონსტიტუციით ერთადერთი დარჩენილი ლეგიტიმური სახელისუფლებო ინსტიტუტი არის მხოლოდ ის. ეს ახლა უკვე მთელმა დასავლეთმაც დაგვიდასტურა, ევროპამაც და შტატებმაც. ამით დასავლეთი გვამხნევებს ამ ბრძოლაში, გიმტკიცებს რომ რამდენადაც შეუძლია, აბარია ჩვენი ზურგი. დანარჩენი საქმე მათი გასაკეთებელია, ვისი ბედიც წყდება, ანუ - ქართული საზოგადოების.ახლა უნდა ვაჩვენოთ საზოგადოებამ ხერხემალი. უნდა დავიცვათ თავი და თავისუფლება. ჩვენ გვინდა კონსტიტუციური წესრიგის დაბრუნება! დიახ, წესრიგის დაბრუნება! ეს სიბინძურე, უმოწყალოდ რომ სცემენ ახალგაზრდებს სწორედ იმიტომ ხდება, რომ ოცნებამ არჩევნების მიტაცებით და შემდგომი არალეგიტიმური ნაბიჯებით თავად მიატოვა კონსტიტუციური წესრიგი.ახლა მთელი ქართული საზოგადოება უნდა დადგეს ფეხზე, დიდი და პატარა, ყველა ქალაქში, ყველა ქუჩაზე და გამოხატოს პროტესტი. არ უნდა წამოვეგოთ პროვოკაციას. არ უნდა მივმართოთ ძალადობას. ამიტომ უფროსმაც და უმცროსმაც, ძლიერმაც და სუსტმაც გამოვხატოთ ჩვენი სამართლიანი პროტესტი და მშვიდობიანი, არაძალადობრივი ფორმით ვაჩვენოთ, რომ გვინდა სასწრაფოდ დაბრუნდეს ეს ქვეყანა კონსტიტუციურ წესრიგში. შეწყვიტოს ოცნებამ ძალის გამოყენება და აღიაროს ქართული საზოგადოების ნება. ჩვენი ძალა სიმრავლეში, ერთობაში და სიმართლეშია. ამ სამი რამის პირისპირ უხეში ცინიკური ძალა უსუსურია.ახლა თუ ვიორჭოფებთ, არ გამოვიჩენთ სიმამაცეს, არ გამოვიჩენთ ერთმანეთისადმი, ჩვენი ახალგაზრდებისადმი და სამშობლოსადმი სიყვარულს, ეს ყველაფერი მალე გახდება უკონტროლო და ისეთ დაპირისპირებად გადაიქცევა, რომელიც უჩვენოდ და ჩვენს ხარჯზე, ჩვენი დამცირების და დაჩაგვრის ხარჯზე გადაწყდება ბოროტ ძალებს შორის.აი, ეს არის ოცნების დაპირებული მშვიდობა, ვისაც ოცნება მშვიდობის მტრედი გეგონათ. არეულობას თავად ესწრაფვიან. მშვიდობიან პროტესტს რა ძალით ახშობენ, ხომ ხედავთ?დღესვე! ყველამ ერთად, ერთხმად, მთელმა საქართველომ უნდა მოვითხოვოთ ამ კრიზისის სამართავად საკოორდინაციო საბჭოს შექმნა, რომელშიც გვინდა ვიხილოთ პრეზიდენტი, რომელშიც აუცილებლად უნდა იყვნენ ოთხი პოლიტიკური სუბიექტი (რადგან მათ გარეშე დასავლეთს გაუჭირდება ამ საბჭოს ლეგიტიმურად აღქმა) და რაც მთავარია, უნდა იყვნენ საზოგადოების წევრები და ახლა უკვე, ამ ვითარებაში საზოგადოება აუცილებლად უნდა იყოს უმრავლესობაში, იმისთვის, რომ ამ საბჭოს ჰქონდეს საზოგადოების ნდობა და აღიარება.ყველა, ყველა ქალაქში გამოვდივართ გარეთ და ვითხოვთ ამ კრიზისის დასრულებას და ეს დასრულდება მხოლოდ მართვის ცენტრის, საკოორდინაციო საბჭოს შექმნით, რომელსაც ექნება ჩვენი აღიარება, ნდობა და ლეგიტიმაცია და ასევე დასავლეთის ლეგიტიმაცია.პროცესებმა უნდა გადაინაცვლოს პოლიტიკის კეთების ცივილურ ფორმებში ამ სისხლიანი ფორმების ნაცვლად.მოგმართავთ მთელ საზოგადოებას - შეხედეთ თვალებში თქვენს შვილებს, თქვენი ოჯახის წევრებს, თქვენს მეგობრებს. მათთვის, მათი სიყვარულისთვის, მათი ბედნიერებისთვის გამოდით დღეს თქვენი ქალაქების ქუჩებში! დაიცავით თქვენი ადამიანები!უკონტროლობის და ქაოსის, ტკივილის და ცრემლების თავიდან ასაცილებლად გამოდით დღეს თქვენს ქუჩებზე, თქვენს ხიდებზე, ვისაც არ შესწევს ჯანი და ღონე, მაშინ თქვენი სახლების შესასვლელი კარების წინ, მოიდგით სკამი და ეფერეთ მშვიდობის და წესრიგის მოყვარე ადამიანებით სავსე თქვენს ქუჩებს.მშვიდობიანად და ძალადობის გარეშე დაიცავით თქვენი ადამიანები!“ — დრამატურგი პაატა ციკოლია