„სანამ დასკვნა არ იქნება, გარდაცვალების ვერსიებს ნუ წერენ — მატირონ შვილი“: რა თხოვნა დააბარა ლანა ლატარიას დედამ ნანუკა ჟორჟოლიანს

უკრაინაში მებრძოლი ქართველი მეომრის, ზაალ ლატარიას შვილის, 26 წლის ლანა ლატარიას გარდაცვალება და ეკლესიაში გადასვენების საკითხი სოციალურ ქსელში აქტიური განხილვის თემად იქცა.

ზუგდიდისა და ცაიშის ეპარქიის მხრიდან ლანა ლატარიას ტაძრიდან გამოსვენებაზე უარის თქმას საზოგადოებაში სხვადასხვა ვერსიისა და ვარაუდის გავრცელება მოჰყვა. მოქალაქეთა ნაწილი აღნიშნულ გადაწყვეტილებას გარდაცვლილის მამის უკრაინაში ბრძოლას უკავშირებდა, ნაწილი კი — ახალგაზრდა ქალის გარდაცვალებამდე განვითარებულ მოვლენებს.

შექმნილ ვითარებასა და ოჯახის პოზიციასთან დაკავშირებით სოციალურ ქსელში პოსტი გამოაქვეყნა ჟურნალისტმა ნანუკა ჟორჟოლიანმა. მან საზოგადოებას გარდაცვლილის დედის თხოვნა გაუზიარა:

„მე არ ვიცი ჩემი შვილი რატომ მოკვდა და სხვამ როგორ იცის. რა კარგია რომ მოხვედი ნანუკა, მინდა ყველას გადასცე ჩემი თხოვნა“ — მომატირა პანაშვიდზე მისულს, ქართველი მეომრის, ზაალ ლატარიას მეუღლემ, რომელიც ემიგრაციიდან ჩამოვიდა შვილის დასატირებლად.

„ჩემი შვილი მონათლული იყო. ზუგდიდის დადიანების ეკლესიაში ჰყავდა მამაო, იქ მსახურობს დედაჩემიც. ორი შვილი ჰყავდა, ორივე მონათლული. ჯვარი დაწერილი ჰქონდა. იმ მამაომ აუგო წესი, რომელმაც ჯვარი დაწერა. კიდევ ორმა მამაომ აუგო წესი. არანაირი ქირურგიული ჩარევა არ ყოფილა. გინეკოლოგთან ბოლოს 3 თვის წინ იყო. გთხოვ, ყველას გადაეცი, სანამ დასკვნა არ იქნება, ჩემი შვილის გარდაცვალების ვერსიებს ნუ წერენ. მატირონ შვილი. მამამისს ატირონ შვილი.“

მთხოვა ყველასთვის მადლობა გადმომეცა, ვინც იზიარებთ მათ მწუხარებას. ძალიან მძიმე სანახავია მებრძოლი, გაუტეხელი კაცის ცრემლები.