ვიდეო: „ჩვენი საუბარი ჩავიწერე“ - არქიმანდრიტ დოროთე ყურაშვილისა და „იმედის“ ჟურნალისტის სატელეფონო საუბარი

არქიმანდრიტი დოროთე ყურაშვილი:

ტელევიზია „იმედი” დიდი ხანია, დამდევს, რათა ინტერვიუ აეღო; მოდიოდნენ ტაძარში, სადაც ეუბნებოდნენ, როდის ვიქნებოდი მსახურებაზე. მათ არ მოისურვეს მაშინ მოსვლა, როცა ტაძარში ხალხია. როგორც ჩანს, სახელმწიფო სამსახურების დახმარებით გაარკვიეს ჩემი ბინის მისამართი, სადაც ჩაწერილი ვარ და სადაც ცხოვრობს ჩემი მძიმედ ავადმყოფი 90 წლის დედა, მონაზონი ეფემია.
ამ ბინაში დღეს დილით მისულ „იმედის” ჟურნალისტს უთხრეს, რომ ვცხოვრობ არა იქ, არამედ სამების მამათა მონასტერში. ამაზე „იმედის” ჟურნალისტის პასუხი იყო: რა, მონასტერში წავიდა? ეს პასუხი ადასტურებს პროპაგანდისტების მიერ გავრცელებულ, ხელოვნური ინტელექტით შექმნილ ფაილს, სადაც თითქოს მე ვამბობ, რომ მონასტერში ვაპირებ წასვლას.
ეს სიტყვები, რომ მონასტერში ვაპირებ წასვლას, ბოლოს ვთქვი 2000 წლის დასაწყისში, რადგან 2000 წლიდან მონასტერში ვცხოვრობ და, ვინც მონასტერში ცხოვრობს, შეუძლებელია, მონასტერში მიდიოდეს.
დღეს, როგორც კი „იმედის” ჟურნალისტმა გაიგო, რომ ვცხოვრობ და ვიმყოფები სამების მონასტერში, ჩემთვის გაუგებარი მიზეზების გამო, სამებაში არ მოვიდა, არამედ მოვიდა ქვემო ბეთლემის ტაძარში და დამიკავშირდა ტელეფონით.
რადგანაც ვიცოდი და ვიცი, თუ რამდენად ბინძურ პროპაგანდას და ცილისწამებას ეწევიან ჩემს წინააღმდეგ, და არა მხოლოდ ჩემს წინააღმდეგ, ამიტომ ჩვენი საუბარი ჩავიწერე; ისინი ხომ გამოცდილები არიან ინტერვიუს დაჭრაში და სათავისოდ გამოყენებაში.
მინდა, დავგმო მათი ქმედება და ვუთხრა სახელმწიფო სამსახურებს, რომ ჩემი მონაცემები არ გადასცენ თავიანთ პროპაგანდისტულ ტელევიზიებს, რადგან მათი მოქმედებით ჩემს დედას, რომლის ჯანმრთელობა მძიმე მდგომარეობაშია, დიდი საფრთხე შეექმნა და არ განმეორდეს ახობაძის დედის მაგალითი.
მე ოფიციალურად ვიმყოფები სამების საკათედრო ტაძრის მამათა მონასტერში, წირვა-ლოცვას ვატარებ ქვემო ბეთლემის ტაძარში და, თუ ტელევიზიებს მოუნდებათ ჩემთან შეხვედრა, შეუძლიათ იქ მობრძანდნენ.
P. S. ვიდეოს უხარისხობის გამო ბოდიშს გიხდით მაყურებელს.