"3 დღეა ბრაზილიაში ვართ, აქამდე რატომ არ მოხვედით?" - მესი ბრაზილია-არგენტინის სკანდალურად შეწყვეტილ მატჩზე

2022 წლის მსოფლიო ჩემპიონატის საკვალიფიკაციო ეტაპის ეგიდით, ბრაზილიასა და არგენტინას მატჩი  დაწყებიდან 4 წუთის შემდეგ შეწყდა და გაურკვეველი დროით გადაიდო.

თამაშის შეწყვეტის მიზეზი სტადიონზე ბრაზილიის ჯანმრთელობის მონიტორინგის ეროვნული სააგენტოს (Anvisa) წარმომადგენლებისა და პოლიციის გამოჩენა გახდა. 

სააგენტოს თანამშრომლები ეჭვობენ, რომ არგენტინელმა ფეხბურთელებმა, ემილიანო მარტინესმა, ემილიანო ბუენდიამ (ორივე - "ასტონ ვილა"), ჯოვანი ლო ჩელსომ და კრისტიან რომერომ (ორივე - "ტოტენჰემი") ქვეყნის საზღვარი დარღვევებით გადაკვეთეს.

ბრაზილიაში დიდი ბრიტანეთიდან ჩასულმა ყველა ადამიანმა 14-დღიანი კარანტინი უნდა გაიაროს. როგორც Anvisa ამტკიცებს, ზემოაღნიშნულმა მოთამაშეებმა იმიგრაციის სამსახურის თანამშრომლებს ყალბი ინფორმაცია მიაწოდეს და განუცხადეს, რომ ბოლო პერიოდში ბრიტანეთს არ სტუმრობდნენ.

გავრცელებული ინფორმაციით, Anvisa-მ პოლიციას სასტუმროში ამ ფეხბურთელების დაკავებისკენ, შემდეგ კი მათი ქვეყნიდან გაძევებისკენ მოუწოდა. თუმცა, სამართალდამცველების გამოჩენისას ოთხივე მათგანი უკვე ავტობუსში ისხდა და სტადიონისკენ მიემართებოდა.

არგენტინის ეროვნული ნაკრების კაპიტანმა, ლიონელ მესიმ მატჩის შეწყვეტის შემდეგ ბრაზილიის ჯანმრთელობის მონიტორინგის ეროვნული სააგენტოს (Anvisa) წარმომადგენელს მიმართა.

"სამი დღეა ქვეყანაში ვართ, ამ თამაშს ველოდებოდით, აქამდე რატომ არ მოხვედით. მთელი მსოფლიო გვიყურებს", - განაცხადა არგენტინელმა.