"ფეხბურთელები დაწნეხეს" vs "რად უნდა კონსტიტუციის დაცვას ვინმეს ზეწოლა?" - გიორგი გველესიანის განცხადებას კახა ზივზივაძე ეხმაურება

საქართველოს ეროვნული ნაკრების ყოფილი ფეხბურთელი გიორგი გველესიანი საფეხბურთო კარიერის დასრულების შემდეგ საბა საპანაძესთან ვრცელ ინტერვიუში სპორტისა და პოლიტიკის ურთიერთმიმართებას შეეხო. მან აღნიშნა, რომ სპორტი და პოლიტიკა ერთმანეთის განუყრელი „მეგობრები არიან“ და მათი გამიჯვნა შეუძლებელია. გველესიანის თქმით, 2024 წლის აპრილში - იმ პერიოდში, როდესაც პარლამენტში „უცხოური გავლენის გამჭვირვალობის შესახებ“ კანონპროექტის ინიციირებას მასშტაბური საპროტესტო აქციები მოჰყვა და ეროვნული ნაკრების წევრებმა ევროპული კურსის მხარდამჭერი განცხადებები გამოაქვეყნეს - ფეხბურთელები გარკვეული ძალების მხრიდან ზეწოლას განიცდიდნენ.

აღნიშნულ განცხადებას სოციალურ ქსელში გამოეხმაურა ეროვნული ნაკრების თავდამსხმელის, ბუდუ ზივზივაძის მამა - კახა ზივზივაძე, რომელმაც ყოფილი თანაგუნდელის პოზიცია მკაცრად გააკრიტიკა.

გიორგი გველესიანის კომენტარი:

„2024 წლის აპრილში, როცა საქართველოს ეროვნული ნაკრების ფეხბურთელებს სხვადასხვა ძალებისგან გარკვეული წნეხი ჰქონდათ, რომ მხარდამჭერი პოსტები და განცხადებები დაედოთ სოციალურ ქსელში, უმეტესობამ დაწერა, რომ ჩვენი გზა არის ევროპაში და აი, ეს არის აქსიომა.

მე დავსვი აქ შეკითხვა, რომ არ ვარ, ბატონებო, ამის წინააღმდეგი, მაგრამ ვიცით, ეს რას მოუტანს ჩვენს ეკონომიკას? გააზრებული გვაქვს, ეს რას მოუტანს ჩვენს დემოგრაფიულ მდგომარეობას? კითხვა დაისვა - რაიმე კავშირში შესვლა რატომ არის ჩვენი პანაცეა... დღესაც საჯაროა ჩემი პოსტი. ჯერ კიდევ მაშინ ვსაუბრობდი, თუ რა მოაქვს ფობიებს, ქსენოფობიებს, რუსოფობიებს და ზოგადად სხვადასხვა ფობიებს - არაფერი კარგი, რაც ახლა აქტუალურია ჩვენს პოლიტიკაში“.

კახა ზივზივაძის პასუხი:

„არ ვაპირებდი პასუხს, მაგრამ მართლა მაინტერესებს, ამ ბიჭმა გამაგებინოს, რომელმა ძალებმა იმოქმედა და დაწნეხეს ფეხბურთელები (პირველი მე ვიქნები, ვინც პასუხს მოსთხოვს ჩემს შვილს, თუ ვინმეს გავლენით რაიმე თქვა), რომ თავისი აზრი გამოეხატათ... მოღალატეებს რომ უწოდებს თანაგუნდელებს, ნეტავ სინდისი არ აწუხებს?

რა გამოდის, 26 ფეხბურთელიდან 4-მა „გაუძლო“ ძალების დაწნეხვას?

რად უნდა კონსტიტუციის დაცვას და რეფერენდუმის შედეგებს ვინმე ძალების ზეწოლა? ვალდებულები არა ვართ?“