მძიმე სოციალური ყოფა, მომატებული კრიმინალი და სპორტი, როგორც თაობების გადარჩენის გზა

რატომ არის მნიშვნელოვანი ახალგაზრდებისთვის სპორტული ცხოვრების წესის აქტიურად დამკვიდრება ჩვენს ყოველდღიურობაში და როგორ იცავს სპორტული აქტივობა ახალგაზრდებს თავი აარიდონ არასწორი ცხოვრების წესს, იყვნენ მეტად მოტივირებული და ჰქონდეთ საშუალება მიიღონ შესაბამისი განათლება.

გივი სულაძეს, რომელიც დღეს ამერიკის შეერთებულ შტატებში იმყოფება, სურვილი აქვს განვითარების შემდგომი გზა ზესახელმწიფოს განათლების სისტემაში მოძებნოს.

„ჩემი წასვლის მოტივი წინასწარვე გეტყვით რომ არ ყოფილა პოლიტიკური შინაარსის, რასაც ხშირად აქვს ადგილი ჩვენს რეალობაში. მთავარი მოტივი, რამაც გადამაწვეტინა წასვლა - ესაა მეტი განათლება, მეტი შესაძლებლობები და მაღალი პროფესიონალიზმი.... ამერიკის შეერთებული შტატები კი ნამდვილად არის თანამედროვე სამყაროსთვის და ახალგაზრდებისთვის მეტი შესაძლებლობების ქვეყანა. მე მუდმივი განვითარების და განახლების ძიების პროცესში ვარ და დარწმუნებული ვარ, მსოფლიოს ლიდერი სახელმწიფო იქნება ის ადგილი, სადაც დასახულ მიზანს მივაღწევ“.

რაც შეეხება სამშობლოში დაბრუნების პერსპექტივას, გივი სულაძე ფიქრობს, რომ ჯობია ქართველმა ახალგაზრდებმა რაც შეიძლება ხშირად იარონ დასავლეთის განვითარებულ ქვეყნებში:

„აუცილებელიცაა, რომ რაც შეიძლება ხშირად ნახონ ქართველმა ახალგაზრდებმა თანამედროვე სამყაროს მიღწევები და ეზიარონ დასავლურ კულტურას, რომლის ნაწილი დასაბამიდან იყო საქართველო. თუ ჩვენ ვამბობთ, რომ გვინდა გავხდეთ ევროკავშირისა და NAT0-ს წევრი, მაშინ უნდა გვესმოდეს, რომ ჩვენი უსაფრთხოების გზა, რომელიც ჩრდილოატლანტიკურ სტრუქტურებზე გადის, ჩვენგანაც მოითხოვს პროფესიონალიზმს და მაღალ სახელმწიფოებრივ პასუხისმგებლობას. ეს თითოეულ მოქალაქეს მოეთხოვება“ - ამბობს გივი სულაძე.