რატომ მიდის საუკეთესო ქართველი წყალბურთელი საქართველოდან?

გივი სულაძეს, რომელიც 11 წლიდან თამაშობდა წყალბურთს და იყო წარმატებული მოთამაშე, როგორც ქვეყნის შიგნით, ასევე საერთაშორისო ტურნირებზე,  2015 წელს ფეხის ტრამვის გამო მოუწია კარიერის დასრულება. თუმცა ამ სპორტისადმი სიყვარულმა და დამოკიდებულებამ გადააწყვეტინა ამ სფეროში დარჩენა და ახალი თაობის აღზრდასა და განვითარებაში თავისი წვლილის შეტანა. მან მეგობრებთან ერთად ჩამოაყალიბა გუნდი. აღსანიშნავია, რომ ამ გუნდმა შექმნიდან ძალიან მოკლე პერიოდში, 2017 წელს მოიპოვა საქართველოს ჩემპიონობა. გივი 2018 წელს დასახელდა საუკეთესო ახალგაზრდა მწვრთნელად და ამავე წელს დაინიშნა ჯერ ახალგაზრდული ნაკრების მწვრთნელად, ხოლო 2019 წელს რევაზ ჩომახიძის ასისტენტად, რომელიც ეროვნულ ნაკრებს ხემძღვანელობდა.

რატომ გადაწყვიტა წარმატებულმა სპორტსმენმა ქვეყნის დატოვება, ამ თემაზე „ნიუპოსტი“ გივი სულაძეს დაუკავშირდა.

გივი სულაძე:  ჩემი ამერიკის შეერთებულ შტატებში გამგზავრების მთავარი მოტივია უკეთესი განათლების მიღება, გამოცდილების დაგროვება და  პროფესიონალიზმის ამაღლება. გამომდინარე იქედან, რომ ყოველთვის ვარ წინსვლასა და საკუთარი თავის განვითარებაზე  მოტივირებული, ასევე მიზანდასახული და შრომისმოყვარე , ვფიქრობ რომ ამერიკა, მსოფლიოს ლიდერი სახელმწიფო,  იქნება ის ადგილი, რომელიც მომცემს მეტ შესაძლებლობას გავიზარდო პროფესიულად და მივაღწიო დასახულ მიზანს.