შეხვედრა კლანთან - კობახიძემ სანქცირებულ მოსამართლეებს მხარდაჭერა გამოუცხადა

ირაკლი კობახიძე უზენაეს სასამართლოს მოსამართლეებსა და იუსტიციის უმაღლესი საბჭოს წევრებს შეხვდა. კობახიძის ადმინისტრაციის მიერ გავრცელებულ ფოტოებში ჩანს, რომ შეხვედრას სანქცირებული ლევან მურუსიძეც ესწრებოდა.

კობახიძემ მათ მხარდაჭერა გამოუცხადა და სანქციებს "ტრაგიკული მოვლენა" უწოდა.

„სანქციები არის პოლიტიკური ჩარევის ყველაზე უხეში მცდელობა, ეს არის ტრაგიკული მოვლენა იმ ქვეყნებისა და სუბიექტებისთვის, რომლებიც ასეთი საქმით არიან დაკავებული, ამ მცდელობასაც ვერ ექნება შედეგი, ქართული მართლმსაჯულების დამოუკიდებლობა 2012 წლიდან დღემდე ვერავინ შეარყია და ვერც მომავალში ვერავინ შეარყევს. ჩვენ ვერავის მივცემთ საშუალებას, უხეშად სცადონ შეჭრა ქართული მართლმსაჯულების დამოუკიდებლობაში. ქართული სასამართლო უნდა იყოს დამოუკიდებელი, არის დამოუკიდებელი და მომავალშიც აუცილებლად იქნება დამოუკიდებელი,“- თქვა კობახიძემ.
შეხვედრაზე კობახიძემ  "წინა ხელისუფლების პირობებში სასამართლო სისტემაში არსებულ მანკიერ პრაქტიკაზე" ილაპარაკა და აღნიშნა, რომ "ზუსტად იგივე ძალები ესხმიან დღეს თავს ქართულ დამოუკიდებელ მართლმსაჯულების სისტემას".

კობახიძეს მადლობა გადაუხადა უზენაესი სასამართლოს თავმჯდომარე ნინო ქადაგიძემ, რომელიც ამტკიცებდა, რომ მოსამართლეები "ბულინგის, შეურაცხყოფის", შანტაჟის" პირობებში მუშაობენ:

„პროფესიული სირთულეების მიღმა, ჩვენს კოლეგებს ბოლო პერიოდში მუშაობა უწევთ გამუდმებული ბულინგის, შეურაცხყოფის პირობებში და ამ ბოლო პერიოდში ამ ყველაფერს დაემატა უკვე შანტაჟის ენით საუბარი. ჩვენ, მოსამართლეები მივეჩვიეთ, რომ ფაქტებსა და რეალობასთან შედარებით, უპირატესობა უნდა მივანიჭოთ აღქმებს და განცდებს და ვიცხოვროთ პარალელურ რეალობაში, თუმცა ამ მოცემულობაშიც კი ვერაფრით ვეგუები და ვერ ვხსნი იმ მოცემულობას, რომ მოსამართლე შეიძლება დასანქცირდეს მხოლოდ იმის გამო, რომ ის თავის პროფესიულ საქმიანობას ახორციელებს, განსაკუთრებით იმ პირობებსა და ვითარებაში, როდესაც ვერც ერთი დასაბუთებული არგუმენტი ვერ იქნა დადებული რომელიმე გადაწყვეტილების უკანონობის თაობაზე“, - განაცხადა ნინო ქადაგიძემ. შეგახსენებთ, 2 აპრილს დიდმა ბრიტანეთმა მოსამართლეთა კლანის ლიდერებს, მიხეილ ჩინჩალაძესა და ლევან მურუსიძეს სანქციები დაუწესა. მათ გარდა, სხვადასხვა ქვეყნების მიერ, სანქცირებული არიან სხვა მოსამართლეებიც.