სანდრო ალთუნაშვილი: ავიცერი იმიტომ, რომ ეს ყველას მოქალაქეობრივი ვალია - პანდემია უნდა დავასრულოთ

როცა არც წამალი და არც რამე სხვა საშუალება გვაქვს, რომ ვებრძოლოთ ვირუსს, გამოსავალი არის აცრა,- ამის შესახებ ბათუმის დინამოს ფეხბურთელი სანდრო ალთუნაშვილი ამბობს. ფეხბურთელი სრულად ვაქცინირებულია და აღნიშნავს, რომ აიცრა, რადგან, პირველ რიგში, ეს ყველას მოქალაქეობრივი ვალია.

"ორი დოზით, სრულად ვაქცინირებული ვარ. ავიცერი, პირველ რიგში, იმიტომ, რომ ეს ყველას მოქალაქეობრივი ვალია. როცა ჯანმრთელობას ეხება საქმე უნდა გავითვალისწინოთ იმ ადამიანების აზრი, ვინც კომპეტენტურია ამ საქმეში. შემდეგ, უკვე, რა თქმა უნდა, ჩემი და ოჯახის წევრების ჯანმრთელობისთვის. ასევე, საქმისათვის, რადგან ჩემს პროფესიაშიც აუცილებელია ვაქცინირებული იყო.

​ვფიქრობ, პანდემიის დამარცხებისთვის ერთ-ერთი მთავარი პირობა არის ვაქცინაცია. მგონია, რომ ხალხი ბოლომდე ინფორმირებული არ არის ამ აცრების და მათი მნიშვნელობის შესახებ და ამიტომ იკავებენ თავს",- ამბობს ალთუნიშვილი.

ბათუმის დინამოს ფეხბურთელის თქმით, პანდემიის გავრცელების თავიდან აცილების მიზნით დაწესებულმა შეზღუდვებმა სპორტსმენები დააზარალა. ამბობს, რომ განსაკუთრებით რთული მისთვის ცარიელი ტრიბუნები და გულშემატკივრების გარეშე ჩატარებული საფეხბურთო მატჩები იყო.

"პანდემიის გამო, ბოლო 2 წლის განმავლობაში, ხშირად 1 თვით და მეტით გვიწევდა ვარჯიშების გაჩერება და ფეხბურთი ისეთი სპორტია, როდესაც ამდენი ხნით ჩერდები, შენს საქმეს სწყდები ფორმიდანაც ვარდები და ისე ვეღარ აგრძელებ როგორც საჭიროა. მაყურებელთა დასწრების აკრძალვაც რთული იყო ჩვენთვის. როცა ტრიბუნაზე გულშემატკივრები არიან სულ სხვანაირად ხარ მოტივირებული და თამაშიც მეტად გსიამოვნებს. თან ბათუმის დინამოს ისეთი ფანკლუბი და გულშემატკივარი გვყავს, ყველაზე რთულად, ალბათ, ჩვენ შეგვეხო ეს შეზღუდვა.

​ყველა ადამიანს საკუთარი აზრი გააჩნია, აცრის გადაწყვეტილებასაც ინდივიდუალურად იღებს, მაგრამ ახლა , როცა არც წამალი და არც რამე სხვა საშუალება გვაქვს, რომ ვებრძოლოთ ვირუსს, გამოსავალი არის აცრა, რომ დავასრულოთ პანდემია",- აცხადებს სანდრო ალთუნაშვილი.