"ოლიგარქის ღალატის კომისიას ორი უმთავრესი ფუნქცია აქვს..." - მიხეილ სააკაშვილის განმარტება

"ოლიგარქის ღალატის კომისიას ორი უმთავრესი ფუნქცია აქვს, დანერგოს რუსული ვერსია 2008 წლის ომის და დაადანაშაულოს მასში საქართველო და მოახდინონ შევარდნაძის კორუფციული სისტემის რეაბილიტაცია" - ამის შესახებ საქართველოს მესამე პრეზიდენტი, მიხეილ სააკაშვილი Facebook-ის საკუთარ გვერდზე წერს.

მიხეილ სააკაშვილი ფიქრობს, რომ "ქართული ოცნება" მოსკოვის დაკვეთით მოქმედებს, რომელსაც "ფერადი რევოლუციები" "ყელში ძვალივით აქვს გაჩხერილი".

ოლიგარქის ღალატის კომისიას, რომელსაც ამიერიდან ყველა წესიერი ადამიანი უარს ეუბნება თანამშრომლობაზე, აქვს ორი უმთავრესი ფუნქცია:

1) დანერგოს რუსული ვერსია 2008 წლის ომის და დაადანაშაულოს მასში საქართველო

2) მათ თვითონვე განაცხადეს, რომ ვარდების რევოლუციამდე საქართველო თურმე სწორი გზით მიდიოდა და 2003 ში ამ გზას გადაუხვია. ადამიანურ ენაზე ეს ნიშნავს შევარდნაძის კორუფციული სისტემის რეაბილიტაციას.

რატომ აკეთებენ ამას? საქმე იმაშია რომ ქოცები ყველაზე მეტად დაბოღმილები არიან ახალ თავისუფალ ნიჭიერ თაობაზე, რომელთაც არ იციან რა მოუხერხონ.

ეს ახალგაზრდები გაიზარდნენ და განათლება მიიღეს კორუფციისგან თავისუფალ გარემოში და ეს ვერ უპატიებია კორუფციული სისტემის ამღორძინებლებს.

რა თქმა უნდა, ეს მეორე ამოცანაც, მათ შორის მოსკოვის დაკვეთაც ეხმაურება, რომელსაც ყელში ძვალივით აქვს გაჩხერილი "ფერადი რევოლუციები" და  სწორედ კლეპტოკრატიული რეჟიმების გარემოცვაში გრძნობს თავს კომფორტულად." - წერს მიხეილ სააკაშვილი.