რა თქვა სალომე ზურაბიშვილმა სიტყვით გამოსვლისას - პრეზიდენტის სიტყვა სრულად

საქართველოს მეხუთე პრეზიდენტმა, სალომე ზურაბიშვილმა პროტესტის 124-ე დღეს, რუსთაველის გამზირზე შეკრებილებს სიტყვით მიმართა.

ზურაბიშვილმა ისაუბრა 31 მარტის მნიშვნელობაზე, ქვეყანაში არსებულ სიტუაციასა და სამომავლო გეგმაზე.

თქვა რომ პროევროპული პოლიტიკური სპექტრის მონაწილეობით შეიქმნება წინააღმდეგობის პლატფორმა.

განცხადებას უცვლელად გთავაზობთ: 
ზუსტად 34 წლის წინ საფუძველი ჩაეყარა თანამედროვე, დამოუკიდებელ ქართულ სახელმწიფოს.

1991 წლის 31 მარტს ქართველი ამომრჩევლის 90.7%-მა დაიბრუნა საკუთარი ქვეყანა; ხმა მისცა დამოუკიდებლობას, ხმა მისცა რუსეთის ოკუპაციის სამუდამოდ დასრულებას.
დამოუკიდებლობის ხელახლა მოპოვება 70 წლის საბჭოთა და რუსული მონობის შემდეგ არც ადვილი იყო და არც ადვილად სარწმუნო საზოგადოებისთვის. მაშინაც უნდობლობა, უიმედობა, ორპირობა, კონფორმიზმი და საკუთარი ინტერესები აბრკოლებდა გათავისუფლების გზას და ბუნდოვანს ხდიდა გამარჯვების შანსს.

მაგრამ მაშინაც იყვნენ საქართველოს მომავალსა და თავისუფლების გარდაუვალობაში დარწმუნებული მებრძოლები... და მათ შეძლეს ის, რაც ბევრს შეუძლებლად მიაჩნდა. ეს შეძლეს მშვიდობიანად. რთული ნაბიჯი გადადგეს გამბედაობით და რწმენით. ვინ წარმოიდგენდა, რომ საქართველო ასეთი უმრავლესობით გაიმარჯვებდა, რომ საქართველო ამით საკუთარ ნებას და ნების ერთიანობას ასე ნათლად გამოხატავდა? ალბათ, მაშინაც იყვნენ ურწმუნონი, ვინც ამბობდა – „რუსეთი არასოდეს დათმობს, რეჟიმი არასოდეს დათმობს!“ და მაინც დაათმობინეს!

ეს გამარჯვება მარტივი არ ყოფილა – ეს გამარჯვება იყო 1921 წლის ბრძოლების, 1923/24 წლის აჯანყებების, 1978 წლის 14 აპრილის ქართული ენის დასაცავად გამართული გამოსვლებისა და 1989 წლის 9 აპრილის მსხვერპლის შედეგი. სწორედ ბრძოლაში გამძლეობამ, ურყევმა რწმენამ და მეთაურების გამბედაობამ მოიტანა რეფერენდუმი, 9 აპრილის დამოუკიდებლობის გამოცხადება და შემდგომ 26 მაისი.
საქართველოს ბრძოლა ყოველთვის უთანასწორო იყო – შიდა თუ გარე მტერთან, უცხო დამპყრობლებთან, მაგრამ საქართველო ყოველთვის იმარჯვებდა, რადგან წინ უძღოდა თავისუფლებისთვის მებრძოლთა მშვიდობიანი ჯარი. დღესაც ეს მშვიდობიანი ჯარი დგას რუსთაველზე და ჩვენი ქალაქების ქუჩებში. დგას და წინააღმდეგობას უწევს უსამართლობას, ძალადობას, დამონებას, დაპყრობას.

დღესაც ასეა – და თქვენ, აქ მდგომნი, ზამთრის სიცივეში, წყლის ჭავლის ქვეშ, უსახო და უსულო მოძალადეების პირისპირ შიშველი ხელებით, კვლავ იგივე შემართებით უარს ეუბნებით უცხო ქვეყნის, უცხო რეჟიმის გაბატონებას. თქვენთან ერთად დგას საქართველო, დგანან ჩვენი ისტორიის ყველა დროის გმირები, დგანან 31 მარტის მოთავეები, ზვიადი და მერაბი, და გვესმის მათი ძახილი:
„მოესწრებით იმ დროს, როცა საქართველო თავისუფალი გახდება! მაგრამ იცოდეთ, თუ მაშინაც, დამოუკიდებელ ქვეყანაში, თავისუფლებისთვის შეწყვეტთ ბრძოლას, ამ თავისუფლებას დაკარგავთ თქვენც და ქვეყანაც".
თქვენ განაგრძობთ იმ ბრძოლას, რომელიც არასოდეს შეგვიწყვეტია – ხან დამოუკიდებლობისთვის, ხან თავისუფლებისთვის და ყოველთვის სამართლიანობისთვის!

უკვე 124 დღეა, აქ დგახართ და ითხოვთ იმის დაბრუნებას, რაც ხალხის ნებით, კანონით და კონსტიტუციით გვეკუთვნის: ჩვენი ურყევი არჩევანი – დამოუკიდებლობა, თავისუფლება და ევროპული მომავალი.

ამ ბრძოლამ უკვე მოიტანა შედეგი! ჯერ კიდევ რუსული კანონის წინააღმდეგ დაწყებულმა მასობრივმა პროტესტმა საერთაშორისო ყურადღება და მხარდაჭერა მოიპოვა, რის შედეგადაც დაიმსახურა ევროკავშირის კანდიდატის სტატუსის მინიჭება! ეს თქვენ გააკეთეთ! ეს პატარა მიღწევა არაა
უწყვეტმა პროტესტმა მთელ მსოფლიოს გააგონა ჩვენი ხმა და აჩვენა საზოგადოების მობილიზება ახალი არჩევნებისა და ევროპული მომავლისთვის. დემოკრატიული სამყარო ქართველ ხალხს, ჩვენს ბრძოლას და სამართლიან მოთხოვნებს მხარს უჭერენ. ესეც თქვენი გამარჯვებაა! არჩევნებიდან 5 თვე გავიდა და არც ერთი დემოკრატიული ქვეყანა არ აღიარებს გაყალბებულ არჩევნებს და ხელისუფლების ლეგიტიმურობას. იზოლაციაშია მმართველი პარტია – აქაც გამარჯვებულები ხართ თქვენ, ისინი კი სადღაც ხელის ჩამორთმევას ცდილობენ.

როცა ჩვენი პარტნიორები, მაღალ დონის შეხვედრებზე, თან პარლამენტების წინაშე მიწვევენ - მე და არა მმართველ პარტიას-  ეს თქვენი მხარდაჭერის ნიშანია, თქვენი ბრძოლის აღიარებაა. მე იქ წარმოვადგენ საქართველოს, წარმოგადგენთ თქვენ. ბოლო ვიზიტის დროს ჩვენმა ბალტიისპირელმა მეგობრებმა თქვენთან დამაბარეს: „ხალხს გადაეცით ჩვენი სოლიდარობა და მხარდაჭერა.“

ასევე პირდაპირი მხარდაჭერა იყო როცა ქართველ ხალხს მიმართა პრეზიდენტმა მაკრონმა! ყველა ჩვენი პარტნიორის განცხადება საქართველოს შესახებ თქვენს მოთხოვნებს ეხმაურება – ახალი არჩევნები და სინდისის პატიმრების გათავისუფლება! თქვენი დამსახურებაა ისიც, რომ, მიუხედავად ბევრი სხვა მსოფლიო გამოწვევისა, საქართველოს სამართლიანი ბრძოლა მაინც რჩება დღის წესრიგში.
მთავარი მიღწევა, თუ არა ჯერ გამარჯვება, ისაა, რომ ვერ შეძლეს ქუჩაში მდგომი ქართველი ხალხის გატეხვა! ვერც ძალადობით, ვერც დაშინებით, ვერც რუსული კანონებით და ვერც რუსული პროპაგანდით. ევროპული მომავლისთვის ბრძოლის პროტესტში დაიბადა ჭეშმარიტი სამოქალაქო სოლიდარობა და ეროვნული თანხმობა!

მეორეს მხრივ, კი მმართველი პარტიის რეპრესიული რეჟიმის ყოველდღიური გამკაცრება მხოლოდ მათი პოლიტიკის წარუმატებლობის ნიშანია: ვერ გააჩერეს პროტესტი, ვერ გააჩუმეს ხალხი, ვერ ჩაახშეს, ვერ დააშინეს, ვერ დააქუცმაცეს. ამდენი ფული, უამრავი ბერკეტი და უზომო ძალა ერთ ხელშია, მაგრამ შედეგი არაა!
ისიც უნდა ვიცოდეთ, რომ გამოსული ადამიანების რაოდენობით არ იზომება პროტესტის ძალა! 4 თვის შემდეგ,  მხნედ დგომაა ზუსტი საზომი. ერთი ქალის ხმა – "ცეცხლი ოლიგარქიას!" – არის ზუსტი საზომი! ერთი დედის შეუპოვარი და დინჯი გამძლეობა – ნამდვილი საზომია!

გურიაში სტიქიის წინააღმდეგ ერთიანობაში, ერთმანეთის დახმარება ჯარიმების გადახდაში, სასამართლოსთან ერთად დგომაში – ესაა ერთობა, და ესაა ძალა, რომელსაც რეჟიმი აღმართული კედელივით ეჯახება. დღეს ჩვენ ერთმანეთის იმედი ვართ უსამართლობის წინააღმდეგ. სწორედ სოლიდარობას და ერთობას, როგორც ინდივიდუალურ ღირსებას და გამძლეობას გამოჰყავს წყობიდან მმართველი პარტია.
ამ მძიმე დროს, ამ უსამართლობასთან ბრძოლასა და გამძლეობაში იბადება ახალი საქართველო, ძალიან ქართული და ძალიან ევროპული. დღეს, ისევე როგორც 1918 წელს და 1991 წელს, ეს არის მყარი საძირკველი, რომ დამოუკიდებელ, დემოკრატიულ და ევროპულ სახელმწიფოს დავიბრუნებთ, რუსეთისა და მისი მესვეურების კლანჭებიდან გამოვგლიჯავთ და საკუთარ გზაზე დავაბრუნებთ.
ბრძოლა გრძელდება!
ეს ბრძოლა მართალია, რადგან მხოლოდ საკუთარ თავს ვეყრდნობით, საკუთარი თავის იმედი გვაქვს! ეს ბრძოლა საქართველოსთვისაა, საზოგადოების ყველა სეგმენტისაა, ყველა რეგიონის და ყველა სოციალური წრისაა. ეს არაა ბრძოლა კერძოდ ვინმეს გამარჯვებისთვის: არ ემსახურება ვინმეს ხელისუფლებაში დაბრუნებას, ან ვინმეს ხელისუფლებაში მოსვლას – ემსახურება ქვეყნის გადარჩენას! და, ამაში ვართ ერთად.

თქვენ, ვინც ასე ამაყად და ურყევად დგახართ, არ ჰყიდით, არ თმობთ და არაფერში ცვლით სამშობლოს.
თქვენ გიპირისპირდებათ ერთი კაცის და უცხო ძალების მსახურობაში მყოფი პატარა ჯგუფი, რომელიც მხოლოდ საკუთარი ფულისა და ვიწრო ინტერესების დაცვას ემსახურება. ბევრი მათგანი არამხოლოდ ვერ აღიარებს რომ რუსეთის საქმეს აკეთებს, არამედ ვერც ბედავს საკუთარი პოზიციის დაფიქსირებას და იმალება ყოვლისმომცველი რუსულ პროპაგანდის  ლოზუნგის უკან – „აბა ომი ხომ არ გინდათ?“.

დღეს ეს რეჟიმი სამ ძირითად საყრდენზე დგას:

ოლიგარქის გარემოცვის ფინანსურ ინტერესებზე. ისინი კვებავენ რეჟიმს;
რუსულ პროპაგანდასა და პროპაგანდისტებზე, რომლებიც ცდილობენ ხალხის მოტყუებას და დამორჩილებას.
რუსულ ძალადობრივ სისტემაზე
მთავარ კითხვაზე, თუ რამდენ ხანს გაძლებს და როგორ დავამარცხოთ ეს რუსული რეჟიმი, ავტორიტარიზმი, როგორ დავაბრუნოთ ქვეყანა ჩვენს მიერ არჩეულ გზაზე, პასუხი სწორედ ამ საყრდენების დასუსტებასა და  ჩამოშლაშია. ეს არის არა ძალადობრივი ბრძოლის რთული, ალბათ, გრძელი, მაგრამ საბოლოოდ წარმატებული გზა, რომელიც საქართველოს სამშვიდობოს გაიყვანს.
ჩვენი ძალა მშვიდობიანი გზაა. მმართველ პარტიას ძალიან უნდა გადაგვიყვანოს ამ  გზიდან, ძალადობრივ ჭიდილში შეგვიყვანოს და ამით დაგვამარცხოს. ამის საშუალებას არ ვაძლევთ და არც მივცემთ. კონსტიტუციური გზით, კანონის უზენაესობის დაცვით ვაგრძელებთ ამ უთანასწორო ბრძოლას.
მეც თქვენთან ერთად! და სანამ ლეგიტიმურად არჩეული პარლამენტი არ ჩამოაყალიბებს ლეგიტიმურ მთავრობას და არ აირჩევს შემდეგ ლეგიტიმურ პრეზიდენტს, მე ვრჩები ჩემი ფიცის ერთგული – ვემსახურო ქვეყანას, დავიცვა კონსტიტუცია და ქართველი ხალხის ნება და ინტერესი.

მიზნის მისაღწევად საჭიროა, ამ ბრძოლას ქუჩის პროტესტთან ერთად და მასთან შეჯერებით, მიეცეს პოლიტიკური ფორმატიც. ამიტომ შევთავაზე და დღეს თქვენს წინაშე საჯაროდ ვაცხადებ, რომ შეიქმნას პროევროპული პოლიტიკური სპექტრის მონაწილეობით - „წინააღმდეგობის პლატფორმა“.

ამ პლატფორმის მთავარი პრინციპი ის არის, რომ იგი ღიაა ყველა პროევროპული პარტიისა და ჯგუფისთვის, რომლებიც მზად არიან გვერდზე გადადონ პოლიტიკური შეუთავსებლობები და ბოლომდე გაიზიარონ პროტესტის ორივე მთავარი მიზანი:

1.დაინიშნოს ახალი და თავისუფალი არჩევნები;

2. გათავისუფლდნენ სინდისის პატიმრები.

ამ მიზნების მისაღწევად წინააღმდეგობის პლატფორმა თანხმდება, რომ შეაჯეროს პოლიტიკური პოზიციები, რათა კოორდინირებულად, ანუ უფრო ეფექტურად, ამხილოს და დაუპირისპირდეს რეჟიმს და მის ქმედებებს. წინააღმდეგობა გაუწიოს და წინ აღუდგეს რეჟიმის მცდელობას გაანადგუროს საქართველოს განვითარების ყველა პერსპექტივა და მისი ევროპული მომავალი.

პლატფორმა მოამზადებს შეთანხმებულ პოლიტიკურ პოზიციებს გასატანად ქვეყნის შიგნით და გარეთ: კოორდინირებული პოლიტიკური პროცესი ნიშნავს იმას, რომ პრეზიდენტის ეგიდით შეიკრიბებიან პლატფორმის მონაწილე სუბიექტები, შეაფასებენ პოლიტიკურ გამოწვევებს, შეაჯერებენ პოზიციებს და შესაძლო ქმედებებს. ამის შესახებ საზოგადოება სრულად და მყისიერად იქნება ინფორმირებული და მჭიდრო კომუნიკაცია დამყარდება სამოქალაქო საზოგადოებასთან და პროტესტის მონაწილე ჯგუფებთან, რათა ერთობლივი სტრატეგია მიღწეული იყოს.

წინააღმდეგობის პლატფორმაში მონაწილე პარტიები თანხმდებიან არჩევნების ახალ დასაწესებელ პირობებზე და ხმების ერთიანად და ეფექტურად დაცვის მექანიზმის აუცილებლობაზე.

მზადყოფნა არჩევნებისთვის – მიუხედავად იმისა, როდის დაინიშნება ის  – ჩვენი მოვალეობაა. მმართველმა პარტიამ ვერ უნდა შეძლოს და გაატაროს თავისი მორიგი სცენარი, მოულოდნელად დანიშნოს არჩევნები უცვლელი მოცემულობით და გაყალბების შესაძლებლობაც ამით შეინარჩუნოს.

ჩვენი პასუხისმგებლობაა დროულად მოვემზადოთ და საზოგადოებასთან და სამოქალაქო სექტორთან ერთად დაუყონებლივ შევუდგეთ,  დამკვირვებლების მასობრივ გადამზადებას, რათა ერთიანად და ეფექტურად დავიცვათ წინააღმდეგობის ხმები.

პარტიული საქმიანობა ამ შემთხვევაში უნდა ექვემდებარებოდეს საერთო ინტერესებსა და წინააღმდეგობის გამარჯვების მიზანს! საერთაშორისო ასპარეზზეც აუცილებელია მეტი კოორდინაცია, ამიტომ ვგეგმავთ ერთიანი კალენდარის შექმნას, კოორდინირებულ ვიზიტებსა თუ გზავნილებს, თუნდაც ერთიან სტრატეგიას, რომელიც პარტნიორების მხარდაჭერის გაძლიერებას და მათთვის დიპლომატიური ნაბიჯების შეთავაზებას მოიცავს.

პარტიები, რომლებიც თანხმდებიან წინააღმდეგობის პლატფორმაში მონაწილეობაზე, აღიარებენ ,,ქართულ ქარტიას“,  როგორც ერთობლივ პრინციპებს და მხარს უჭერენ მას, როგორც სამომავლო პროგრამას, რომლის მეშვეობით საქართველოს დროულად დავაბრუნებთ დემოკრატიისა და ევროინტეგრაციის გზაზე.

ახალი ეტაპი იწყება!

ნუ შეგეშინდებათ, რომ თითქოს ხანდახან ბევრი ადამიანი არ დგას რუსთაველზე, თუ ვიღაც გაიყიდა, მოისყიდეს, თუ ვიღაც შთაგაგონებთ, რომ თურმე მუხტი არაა, ლიდერი არაა, ჭორებს ავრცელებენ, რომ დაგვყონ და დაგვაპირისპირონ, გახლეჩილებს და ცალ-ცალკე ხომ მოგვერევიან? ნუ გექნებათ ნიჰილიზმი, ცრუ მოლოდინებს არ გაჰყვეთ, მე გპირდებით, რომ ამას არ შეგიქმნით და არც მოგატყუებთ! არც კი ვიცით, ეს გზა გრძელია თუ უცებ დასრულდება და ვერავინ იტყვის ამას, რადგანაც ავტოკრატიის დასრულება კანონზომიერებას არ ემორჩილება, მაგრამ იმედსა და რწმენას არც ერთი კანონი არ აწესრიგებს.

ჩვენ ძალიან ბევრნი ვართ, რადგანაც ყოველდღიურად რეჟიმი ახალ მოწინააღმდეგეებს თვითონ ბადებს: ყველა ის ადამიანი, ვისი ახლობელიც უცებ უსამართლობის მსხვერპლი აღმოჩნდა, ოჯახები, რომლებიც ჰკარგავენ არა მხოლოდ მარჩენალს, არამედ მიზანსა და მომავალს, მოსწავლეები, რომლებსაც ართმევენ უცხოეთში სწავლის პერსპექტივას, ემიგრანტები, რომლებიც ქვეყანაში დაბრუნების პერსპეკტივას ვერ ხედავენ, მცირე მეწარმეები, რომელთაც არსებობის საშუალებას ართმევენ, ესენი ამსხვილებენ წინააღმდეგობის ჯარს.

ვინ დარჩა რეჟიმის დამცველ ძალად? ერთი ვიწრო ჯგუფი, რომელიც უშუალოდ სარგებელს პოულობს, პრემიებს იღებს, ტენდერებს ირგებს, მიწებს ირიგებს, ისინი, ვისაც არ სრცხვენია, რომ ემსახუროს ამათ. და რეალურად ცოტანი  არიან... და დღეიდან კიდევ უფრო შემცირდა მათი მხარდამჭერების რაოდენობა, რადგანაც წარმოუდგენელი ჩაიდინეს.

არ შემიძლია, მე დღეს, 31 მარტს, ვიდგე აქ, თქვენს წინაშე, როგორც  მთავარსარდალი და არ აღვუდგე იმ საზიზღრობას, რომლითაც ცდილობენ ჩვენი ყურადღება გადაიტანონ და სანახაობად აქციონ: ვსაუბრობ პროკურორ თეა „ვიშინსკის“ ეგრეთ წოდებულ საინვესტიგაციო კომიტეტზე. ეს არც ისტორიის გარკვევას, არც გაგებას ემსახურება. ეს არის სადამსჯელო წარმონაქმნი, რომელიც ემსახურება შურისძიებას. მაგრამ უფრო შემაშფოთებელია მოღალატე რეჟიმის მთავარი მიზანი, ე.ი. ქართული სახელმწიფოს ბოლომდე დაშლა და განადგურება, ანუ უშუალოდ რუსული დაკვეთის შესრულებას. იმის შემდეგ, რაც ამ რეჟიმმა ყველა დამოუკიდებელი დაიმორჩილა, მას შემდეგ, რაც საქართველოს სასამართლო სისტემა გააუქმა, მოახდინა პოლიციის დისკრედიტაცია და მას ჩამოართვა მთავარი მისი ფუნქცია – ანუ მოქალაქეების დაცვა, ამ ბოლო ნაბიჯით კი ქართული ჯარის ნგრევას ემსახურება.

ასეთი სურათის შექმნა, ჯარის სრული დისკრედიტაცია, მისი შეურაცხყოფა და მაშასადამე, დემორალიზაცია, წარმოადგენს ანტი სახელმწიოფოებრივ ქმედებას.  ეს სამარცხვინო სანახაობა, რომელსაც პირდაპირ ეთერში გვაყურებინებენ, ემსახურება ჯარის სრულ დისკრედიტაციის მცდელობით საზოგადოების დემორალიზაციას. მმართველი, რომელიც ამას მოიფიქრებს და ამას უკეთებს საკუთარ ქვეყანას, ჯარსა და ხალხს, არის მტერი ჩვენი სახელწიფოებრიობის, მაშასადამე  ჩვენი დამოუკიდებლობისა და ჩვენი მომავლის... ცალკეული მოქალაქის მტერი! ამიტომ დღეს – სწორედ დღეს, 31 მარტს – თავისუფლებისა და დამოუკიდებლობის აღნიშვნის დღეს, არ მივეცით უიმედობას თუ სასოწარკვეთილებას. მათაც ეს უნდათ! უნდათ, რომ ერთმანეთს დაგვაპირისპირონ, დაწყებული კამპანიები ამას ემსახურება. მაგრამ, ჩვენ ვიცით, რომ ასეთი შიდა მოღალატეებისა და გარე მტრის ერთობლივი მიზნის შესრულებას ქართველი ხალხი არ დაუშვებს, გადაუდგება და მტერს არასოდეს გაამარჯვებინებს! ნამდვილად ვიცი ჩვენი ბრძოლა გაგრძელდება მანამ, სანამ არ გავიმარჯვებთ! ბრძოლა იქნება ბოლომდე!

გაუმარჯოს საქართველოს!