ხაშურის დანგრეული მე-4 სკოლის მოსწავლეებს, ისევ ადგილმონაცვლეობა უწევთ, მე-7 სკოლა, რომელიც მათ 5 წელი იფარებდა, თვითონაც სარემონტო გახდა

ხაშურის მე-4 საჯარო სკოლის 300 მოსწავლე სასწავლო პროცესს მე-7 საჯარო სკოლის ნაცვლად I საჯარო სკოლაში გააგრძელებს. მე-4 სკოლის ძველი შენობა დაანგრიეს, თუმცა ახალი 5 წლის განმავლობაში ვერ ააშენეს, რის გამოც მოსწავლეები 2021 წლიდან მე-7 სკოლაში სწავლობდნენ. ინფორმაციას ამის შესახებ გამოცემა „ქართლის ამბები“ ავრცელებს.

სკოლის დირექტორის, ნანა გაგნიძის განცხადებით, მორიგი ადგილმონაცვლეობის მიზეზი მე-7 სკოლის შენობაში დაგეგმილი სარემონტო სამუშაოებია. ინვენტარისა და ავეჯის ტრანსპორტირების დასრულებამდე მოსწავლეები დროებით ონლაინ სწავლების რეჟიმზე გადავიდნენ. მუნიციპალიტეტის მერიამ ავეჯის გადასაზიდად ტრანსპორტი უკვე გამოყო. 

„ქართლის ამბები“ ცნობით, ანალოგიური ვითარებაა ხაშურის მე-5 საჯარო სკოლაშიც - 18 სექტემბრიდან მოსწავლეებმა შენობა დატოვეს და მე-8 სკოლაში გადაყვანამდე სწავლას დროებით ონლაინ რეჟიმში განაგრძობენ.

მე-4 საჯარო სკოლა ხაშურის ერთ-ერთ მჭიდროდ დასახლებულ ნაწილში — შინდარის უბანში მდებარეობს. აღნიშნული სკოლა არჩევნების დროს საარჩევნო უბნის ფუნქციასაც ითავსებდა, სადაც 2500-მდე ამომრჩეველი იყო რეგისტრირებული. სკოლის დანგრევის შემდეგ კი საარჩევნო უბანი კომერციულ ფართში გადაიტანეს, რომელიც არაასაარჩევნო პერიოდში საცხობსა და მაღაზიას წარმოადგენს.

ხაშურის საჯარო სკოლებში შექმნილი ვითარება კიდევ ერთხელ უსვამს ხაზს რეგიონებში ინფრასტრუქტურული პროექტების გაჭიანურებულ ვადებსა და ლოგისტიკურ ხარვეზებს. ძველი შენობის დანგრევის შემდეგ 5 წლის განმავლობაში ახლის აშენების შეუძლებლობა და მოსწავლეთა სისტემატური გადაყვანა ერთი სკოლიდან მეორეში არა მხოლოდ სასწავლო პროცესს აფერხებს, არამედ დამატებით დისკომფორტს უქმნის ბავშვებს, პედაგოგებსა და მშობლებს. ამასთან, საზოგადოებრივი დანიშნულების ინფრასტრუქტურის არარსებობა ადგილობრივ დონეზე სამოქალაქო და საარჩევნო პროცესების გამართულად წარმართვასაც ართულებს.