"ისლამისტები, კრიმინალური კლანები და ექსტრემიზმი: რა საფრთხეს უქმნის ბერლინს მემარცხენეების აღზევება?" - გიორგი ასტამაძის ანალიზი

გერმანიაში მოღვაწე ქართველი ისტორიკოსი გიორგი ასტამაძე ბერლინში ჩატარებული არჩევნების შედეგებს ეხმაურება. მისი შეფასებით, მემარცხენე პარტიის („ლინკე“) გამარჯვება სერიოზულ საფრთხეებს შეიცავს, რაც გამოწვეულია პარტიის კავშირებით კრიმინალურ კლანებთან, ისლამისტურ ჯგუფებთან და ანტისემიტურ განწყობებთან. ასტამაძე აღნიშნავს, რომ დემოკრატიულმა ცენტრმა მემარცხენე ექსტრემიზმის წინაშეც ისეთივე ბარიერი უნდა აღმართოს, როგორიც მემარჯვენე რადიკალების შემთხვევაში.

„ბერლინში რაც მოხდა ბოლო არჩევნებზე მემარცხენე პარტიის პირველ ადგილზე გასვლით, ბევრი კიდევ ბოლომდე ვერ აღიქვამს. რატომღაც, ყველა მხოლოდ მემარჯვენე ექსტრემისტებთან კედელზე საუბრობს. არადა, მემარცხენე ექსტრემისტები არანაკლებ საშიშები არიან.

მხოლოდ რამდენიმე ფაქტი: „ლინკეს“ გამარჯვების აღსანიშნავად გამართულ დღესასწაულზე პირადად მივიდა ბერლინის უმსხვილესი ორგანიზებული კრიმინალური ბანდის მეთაური ისა რემო (წარმოშობით ლიბანიდან), რომლის კლანიც 500-დან 1000-მდე ადამიანს აერთიანებს და ათობით დანაშაულში ედება ბრალი. მან განაცხადა: პირველად ვგრძნობ, რომ პარტიისგან მხარდაჭერილი ვიქნებიო. „ლინკეს“ ლიდერმა კი განაცხადა, ვემიჯნებიო, მაგრამ ფაქტი სახეზეა — რემოც და მისი შვილიც ამათ საზეიმო ღონისძიებებზე დაკუნტრუშებდნენ; გარდა ამისა, პირადი მიმოწერები აქვთ პარტიის ლიდერებთან. ამას გარდა, დღესასწაულებში მონაწილეობდა ღიად ისლამისტი ტერორისტების მხარდაჭერაში ბრალდებული არაერთი ადამიანი, როგორიც, მაგალითად, ამ ფოტოზეა — მარჯვენა ტიპი, რომელიც „ლინკეს“ ერთ-ერთ თურქ ლიდერთან პოზიორობს.

გარდა ამისა, გერმანიის ებრაელთა საბჭომ და ებრაული წარმომავლობის ბლოგერებმა ოფიციალურად გააფრთხილეს ბერლინელი ებრაელები, რომ ამ პარტიისთვის არ დაეჭირათ მხარი არავითარ შემთხვევაში, რადგან მის წინასაარჩევნო შეხვედრებზე პალესტინური ფაფახებით ოფიციალურად ისრაელის განადგურების მოწოდებები და ინტიფადას ქება-დიდება მიდიოდა. ებრაული თემი ამ პარტიას „გერმანულ ალტერნატივაზე“ უფრო დიდ საფრთხედ აღიქვამს. საინტერესოა, რომ ერთ-ერთი საარჩევნო-კვლევითი ჯგუფის მონაცემებით, ბერლინში ისლამური ამომრჩევლის 51%-მა „ლინკეს“ მისცა ხმა, რაც მიუთითებს ამ პარტიის მისწრაფებებზე.

ზოგადად, ბერლინში მოსახლეობის საერთო რაოდენობის 42%-ზე მეტი უკვე მიგრანტია, აქედან მნიშვნელოვანი ნაწილი — მუსლიმი. შესაბამისად, როდესაც ხალხი კითხულობს, თუ რატომ დასუსტდნენ ასე ძველი ცენტრისტული დემოკრატიული პარტიები, ერთ-ერთი მთავარი ფაქტორი სოციალური სტრუქტურის ცვლილებაა. იმ ძველ პარტიებს ძველი გერმანელები აძლევდნენ ხმას 30 წლის წინ, რომელთა რაოდენობამაც სულ უფრო იკლო; მიგრანტები კი მნიშვნელოვან როლს თამაშობენ არჩევნებში. ბერლინში ეს უკვე შემდგარი ფაქტია.

მემარცხენე პარტიის წინასაარჩევნო მთავარი დაპირება საბინაო კონცერნების „ქონების კონფისკაცია“ იყო — პირდაპირი გაგებით. სიტყვა Enteignung ამას ნიშნავს. გარდა ამისა — ყველანაირი გადამოწმების გარეშე მოქალაქეობის მიცემა ყველასთვის, ვინც 5 წელზე მეტი ხანია ცხოვრობს ბერლინში (თუნდაც ტერორისტი იყოს), პოლიციის რაოდენობის შემცირება, მათ შორის ისრაელის მხარდამჭერ აქციებსა და ებრაული თემის ღონისძიებებზე და ა. შ. ხშირად წინასაარჩევნო გამოსვლები არაბულ და თურქულ ენებზე მიდიოდა, ისევე როგორც ელიფ ერალფის მიმართვის ნაწილი — გამარჯვების შემდეგ.

მოკლედ, აშკარაა, რომ კარგი არაფერი მოჰყვება ამ ნახევრად კომუნისტი ისლამისტების აღზევებას. ამ პარტიის წინააღმდეგ ისეთივე ცეცხლგამძლე კედელია აღსამართი, როგორიც „აფდ“-სთან. დემოკრატიულმა ცენტრმა ამ ავადმყოფებთან კოალიციები არ უნდა დაუშვას. ქრისტიან-დემოკრატებს ისედაც დიდი ხანია აქვთ ოფიციალურად გამოცხადებული „შეუთავსებლობა“ „ლინკესთან“. იგივე უნდა გააკეთონ სხვებმაც.“ - წერს გიორგი ასტამაძე ფეისბუკზე.