ღარიბაშვილს საფრანგეთის აგენტობას აბრალებენ?! - სტატია, რომელსაც სამთავრობო მედიები აქტიურად აშუქებენ

ქართულ სამთავრობო მედიაში აქტიურად ვრცელდება აზერბაიჯანულ ვებგვერდ haqqin.az-ზე გამოქვეყნებული სტატია ირაკლი ღარიბაშვილის შესახებ. 2026 წლის 26 აგვისტოს ვებგვერდზე ანალიტიკის რუბრიკაში, გამოქვეყნდა ვახტანგ ჯოხაძის სტატია სათაურით: "როცა ზურგს უკან პარიზია, კართან კი პროკურატურა". სტატიის მთავარი სათქმელი არის ის, რომ ირაკლი ღარიბაშვილი ხელისუფლებაში ყოფნის დროს საფრანგეთის ინტერესებით მოქმედებდა. სწორედ ამ აქცენტით ავრცელებენ, ამ სტატიაზე დაფუძნებულ ქარდებს სამთავრობო მედიებიც.

სტატიის რამდენიმე მნიშვნელოვანი ნაწილი 

"საფრანგეთის მოქალაქე სალომე ზურაბიშვილის შემდეგ ირაკლი ღარიბაშვილი თითქმის ყველაზე პროფრანგი ქართველი პოლიტიკოსია. მან არა მხოლოდ განათლება მიიღო საფრანგეთში, არამედ ხელისუფლებაში ყოფნისას ატარებდა პოლიტიკას, რომელიც უფრო მეტად პარიზის ინტერესებს შეესაბამებოდა, ვიდრე თბილისისას. ამ პოლიტიკის საფრთხე საქართველოს სახელმწიფო ინტერესებისთვის მხოლოდ ახლა შეიძლება გაანალიზდეს სრული მოცულობით."

"მას შემდეგ, რაც 2021 წელს ირაკლი ღარიბაშვილი თავდაცვის მინისტრის სავარძლიდან პრემიერის სავარძელში გადაჯდა, მას საფრანგეთისთვის საჰაერო თავდაცვის სისტემების კონტრაქტის ჩაშლის გამო არანაირი პრეტენზია არ წაუყენებია. პირქით, თბილისისა და პარიზის თანამშრომლობა კიდევ უფრო მჭიდრო გახდა. 2021–2023 წლებისთვის ხელმოწერილი პარტნიორობის ახალი შეთანხმების ფარგლებში, საქართველომ სამი წლის განმავლობაში საფრანგეთისგან 483 მილიონი ევროს დახმარება მიიღო. თუმცა, ისევ და ისევ ირაკლი ღარიბაშვილის ინიციატივით, ამ დახმარების „დამუშავება“ ეროვნული ინტერესების საზიანოდ მოხდა, და 2023 წლის ბოლოს სკანდალი აგორდა საქართველოს ტერიტორიის გავლით სომხეთში ფრანგული ჯავშანმანქანების — Bastion-ების ტრანზიტის ირგვლივ.""ღარიბაშვილის პროფრანგული პოლიტიკა არაფრით დაეხმარა „ქართულ ოცნებას“. პირქით, სწორედ პარიზმა დაუჭირა მხარი რადიკალურ ოპოზიციას და 2024 და 2025 წლებში საქართველოში „რევოლუციური“ სახელმწიფო გადატრიალების მცდელობებს. ამასთან, სწორედ ირაკლი ღარიბაშვილი იყო, იმავე ოპოზიციონერების მოწმობით, მმართველი პარტიის ერთადერთი წარმომადგენელი, რომელიც „პროტესტანტებთან დიალოგის“ მომხრედ გამოდიოდა. ეს კი მას შემდეგ, რაც ამ „პროტესტანტებმა“ — ფაქტობრივად პროვოკატორებმა — დაიწყეს პოლიციელების დაწვა მოლოტოვის კოქტეილებით და მეორე „ფრანგის“, სალომე ზურაბიშვილის წაქეზებით, ბავშვების პოლიციის ტყვიებზე მიშვებას აპირებდნენ. ოპოზიციასთან დიალოგს მაშინ კატასტროფის გარდა არაფრამდე მიყვანა არ შეეძლო — საჭირო იყო გადამჭრელი ზომები არეულობის აღსაკვეთად, და ხელისუფლება ამ ნაბიჯზე წავიდა. იმავდროულად, ირაკლი ღარიბაშვილი პროტესტების პიკში, ფაქტობრივად, საფრანგეთის მიერ მხარდაჭერილი „რევოლუციონერების აგენტი“ იყო „ქართული ოცნების“ რიგებში."