„გირჩი“ არის „ქოცების“ პარტია, ხვიჩია - მათი აგენტი“ - ნიკა გვარამია

„კოალიცია ცვლილებისთვის“ ლიდერმა, ნიკა გვარამიამ გადაცემა „რეაქციაში“ „გირჩის“ პოლიტიკურ როლზე ისაუბრა და იაგო ხვიჩია მმართველ გუნდთან თანამშრომლობაში ღიად დაადანაშაულა.

გვარამიას თქმით, „ნაციონალური მოძრაობისგან“ განსხვავებით, ის არასდროს იკადრებს თქვას, რომ მიხეილ სააკაშვილი ბიძინა ივანიშვილთანაა შეკრული, თუმცა მისი შეფასებით, „გირჩის“ ივანიშვილთან კავშირი აშკარაა.

„„გირჩი“ არის „ქოცების“ პარტია, ხოლო იაგო ხვიჩია - მათი აგენტი. ის, რომ „გირჩი“ ბიძინას სატელიტი პარტიაა და ამაში ფულს იღებს, მარტივი მოცემულობაა“, - განაცხადა ნიკა გვარამიამ.

კოალიციის ლიდერი ასევე გამოეხმაურა მიხეილ სააკაშვილის ბოლო სოციალურ პოსტს, სადაც ექსპრეზიდენტმა იაგო ხვიჩიასთან მიმოწერის საკითხი ახსენა:

„ჩემთვის მთავარი სამიზნე კვლავ ბიძინა ივანიშვილია. მე არ მაქვს მიმოწერა იაგო ხვიჩიასთან. სააკაშვილის დღევანდელ პოსტში ხვიჩიას ერთი აბზაცი რომ ეძღვნება, სადაც არც უარყოფაა, რომ მასთან მიმოწერა ჰქონდა და არც იმაზეა ლაპარაკი, თუ რაზე ესაუბრა - რომ შეეშალა და ბანდიტთან მივიდა და არა პოლიტიკოსთან...

იაგო ხვიჩია არის „ქოცების“ აგენტი და ეს სააკაშვილმა ჩემზე უკეთ კი არა, ყველაზე უკეთ იცის. ძალიან საინტერესოა, განემარტა მაშინ, რას ნიშნავს „ქოცების“ აგენტთან მიმოწერა. ამის შემდეგ სამი აბზაცი რომ ეძღვნება გილაურსა და გვარამიას, ეს რა ნორმალური ვითარებაა?“ - აღნიშნა გვარამიამ.