ეროვნულ თავდაცვის აკადემიაში საქართველოს გარემოს დაცვისა და სოფლის მეურნეობის მინისტრის მოადგილის, აკადემიკოს სოლომონ პავლიაშვილისა და პროფესორ ზურაბ გარაყანიძის მონოგრაფიის - „შუა დერეფნის ენერგეტიკული განზომილება“ პრეზენტაცია გაიმართა

28 მარტს საქართველოს  ეროვნულ თავდაცვის  აკადემიაში, გაიმართა საქართველოს გარემოს დაცვისა და სოფლის მეურნეობის მინისტრის მოადგილის, აკადემიკოს სოლომონ პავლიაშვილისა და პროფესორ, თადარიგის პოლკოვნიკ  ზურაბ გარაყანიძის მონოგრაფიის „შუა დერეფნის ენერგეტიკული განზომილება“ პრეზენტაცია, რომელსაც საქართველოს მეცნიერებათა ეროვნული აკადემიის აკადემიკოსი მიხეილ ჯიბუტი, ეროვნული თავდაცვის აკადემიის პრორექტორი ზურაბ ზერეკიძე, მაგისტრატურის პროგრამის ხელმძღვანელი, პოლკოვნიკი ირაკლი უჩაძე  და სხვა თანამშრომლები ესწრებოდნენ.

შეხვედრაზე ისაუბრეს შუა დერეფნის გეოეკონომიკურ  მნიშვნელობაზე, მის როლსა და ადგილზე გლობალიზაციისა და ინტეგრაციის მსოფლიო პროცესებში.

„შუა დერეფნის“ გეოსტრატეგიული ფასეულობა ისაა, რომ ერთი მხრივ, იძლევა ჩინეთის, ცენტრალური აზიისა და სამხრეთ კავკასიის  ერთ გეოეკონომიკურ სივრცედ ჩამოყალიბების შესაძლებლობას და მეორე მხრივ, რაც ჩვენთვის განსაკუთრებით მნიშვნელოვანია,  აფართოებს საქართველოს, როგორც ამ დერეფნის საკვანძო რგოლის გეოკონომიკურ არეალს.

მონოგრაფია აღწერს შუა სატრანსპორტო დერეფნის მახასიათებლებს, გამოწვევებსა და განვითარების პერსპექტივებს, როგორც ჩინეთის მიერ ინიცირებული  „სარტყლისა და გზის ინიციატივის“ (BRI) ნაწილს და მის ურთიერთდამოკიდებულებას  ევროკავშირის Global Gateway, TRACECA და „სამხრეთ გაზის დერეფნის“ (SGC) პროგრამებთან.

ს. პავლიაშვილისა და ზ. გარაყანიძის მონოგრაფია  „შუა დერეფნის ენერგეტიკული განზომილება“ „ახალი აბრეშუმის გზის“  შემადგენელი ნაწილია. ის არის კომპლექსური და სიღრმისეული გამოკვლევა, რომელსაც მნიშვნელოვანი წვლილი შეაქვს საქართველოში მეტად აქტუალური სამეცნიერო მიმართულების - გეოეკონომკის განვითარებაში.

მონოგრაფიაში „შუა დერეფანი“  წარმოდგენილია კომპლექსური ქსელის სახით, რაც აერთიანებს სარკინიგზო, საგზაო, სანაოსნო  მარშრუტებს, ანუ სატრანსპორტო  და ენერგეტიკულ კომპონენტებს. ეს იმას ნიშნავს, რომ „შუა დერეფანი“ ფაქტობრივად , ეკონომიკური დერეფანია, ამიტომ ის შეიძლება გახდეს მრავალი რეგიონული ინსტიტუტის ავანგარდი. დერეფნის ირგვლივ რეგიონული ინტეგრაცია  სარგებელს მოუტანს ჩინეთსა და ევროპას, ასევე მათ შორის - დერეფნის ეკონომიკურ ზონაში მყოფ სახელმწიფოებს.