„ორი დროშით იყო მოსული, თავისი მათხოვა და ზემოთ აღვმართეთ ორმა ქართველმა ამაყად“ - როგორ იხსენებს ქართველი სტუდენტი შოვში დაღუპულ ზაზა მესხთან შეხვედრას

შოვში, სტიქიის ზონაში 8 ადამიანის ძებნა-შველის ღონისძიებები ამ დრომდე მიმდინარეობს. დაკარგულებს შორის არის ზაზა მესხი და მისი სამი შვილი. ზაზა მესხი მეუღლესთან და შვილებთან ერთად ჰოლანდიიდან ჩამოვიდა და შოვში დასასვენებლად იმყოფებოდა. სტიქიის შედეგად გარდაცვლილებს შორის იდენტიფიცირებულია ზაზას მეუღლე – ალინა პოლიკოვსკა.

სოციალურ ქსელში მოქალაქე ლიზა ოთიურიძე ზაზა მესხის შესახებ წერს და მასთან შეხვედრას იხსენებს:

„როდესაც სტუდენტი გოგო, მრავალი კილომეტრით შორს, სხვა ქვეყანაში, უკრაინის ოკუპაციას აპროტესტებ და უცბად ხედავ ზღვა ხალხში საქართველოს დროშას აღმართულს, სიამაყით და ბედნიერებით ივსები.

შემდეგ მისი მიმართულებით სვლას იწყებ, თან სიხარულისგან გულისცემა გემატება. აღმოაჩენ ადამიანს, რომელთან გასაუბრებაც გარწმუნებს შენი მცირე, მაგრამ მტკიცე ერის პატრიოტიზმში.

ზაზა მქვიაო, წლებია შორს ვარ მაგრამ სულ ჩემი ქვეყნის სადარაჯოზე ვდგავარ და შორიდან როგორც შემიძლია, ჩემს ქვეყანას ვეხმარებიო. გაუხარდა, რომ გამიცნო ქართველი სტუდენტი, დახმარებას დამპირდა, საჭიროების შემთხვევაში. ისეთი პატრიოტი, სუფთა თვალების და ღრმა აზროვნების ადამიანი იყო, გაოცებული დავრჩი.
ძალიან იშვიათად თუ მოუხდენია ასეთი შთაბეჭდილება ვინმეს ასეთ მცირე დროში. ოჯახით და შვილებით მრავალი წელია ნიდერლანდებში ვცხოვრობო.

რუსეთის აგრესიას აპროტესტებდა – ისიც და მეც. მე, სამწუხაროდ, უდროშოდ, ის კი ორი დროშით იყო მოსული. თავისი მათხოვა და ზემოთ აღვმართეთ ორმა ქართველმა ამაყად.
გვარიც მითხრა და ზღვა ხალხში ვეღარ მოვახერხეთ კოორდინატების გაცვლა.

შოვის ტრაგედიისას აღმოვაჩინე დაკარგულების ფოტოებში. ზაზა მესხი ჰოლანდიიდან, შვილებთან ერთად.

მინდა იცოდეთ მისმა მეგობრებმა, რაც ალბათ ისედაც იცით, თქვენ ძალიან მაგარი მეგობარი გყავდათ, რომელიც თავის ქვეყანაზე უზომოდ შეყვარებული იყო“, – წერს მოქალაქე სოციალურ ქსელში.