„გთხოვთ, არ დავიღალოთ და არ მივცეთ ვინმეს უფლება, ჩვენი საფიცარი, ჩვენი სამშობლო გამოგვგლიჯოს ხელიდან“ - რეჟიმის ტყვე ლუკა ჯაბუა

"საყვარელი უნის საყვარელ ბავშვებსროგორ ხართ ბავშვებო? მე ძალიან კარგად ვარ. მხნედ და ამაყად ვგრძნობ თავს, რის საფუძველსაც თქვენ მაძლევთ. UG ხომ ძალიან მიყვარდა, ახლა მეტად შემიყვარდა. მადლობა ყველაფრისთვის: გვერდში დგომისთვის, ბრძოლისთვის, გამხნევებისთვის, და ასეთი ტკბილი სიტყვებისთვის. თქვენ, ასეთი მამაცი და ბრძოლისაკენ მიმართული ადამიანი, რომ არა, არაფერი გამოგვივიდოდა. მრავალგზის წავიკითხე თქვენი წერილები, დაუზარებლად და ყოველ ჯერზე მეტად და მეტად ამავსო ენერგიით, მუხტით, რწმენით.თქვენ ხართ ყველაფრის შემოქმედი, თქვენი წყალობით ვრწმუნდები, რამ ეს ყველაფერი ღირს და არცერთი წამით არ ღირს თავის დახრა. არაფერი ჩაივლის ამაოდ, მით უმეტეს რომ უმთავრესი იდეისთვის ბრძოლა. ბრძოლა, რომელსაც სამშობლოს თავისუფლებისკენ მივყავართ. იმედი მაქვს, მალე ვიზეიმებთ გამარჯვებას. მე მჯერა თქვენი, თქვენი ანთებული გულების, სიტყვების, ერთობის, რწმენის. გთხოვთ, არ დავიღალოთ და არ მივცეთ ვინმეს უფლება, ჩვენი საფიცარი, ჩვენი სამშობლო გამოგვგლიჯოს ხელიდან.ვიცი, რთულია ბოროტების წინააღმდეგ ბრძოლა, მაგრამ ჩვენ, ქართველებს, უამრავი სირთულე, ერთობით ბევრჯერ გადაგვილახავს და დარწმუნებული ვარ, რომ არც ეს იქნება გამონაკლისი.მე არაფერი მიჭირს, პირიქით, ეს გამოცდილება, ჟინი, "სიჯიუტე" მასწავლის, რომ ვერაფერი გადაგეღობება წინ, თუკი შენ იბრძვი იდეისთვის, უმთავრესი იდეისთვის. არაფერი დგას იდეაზე წინ, თუნდაც ფიზიკური თავისუფლება და მე ამის მჯერა.შევხვდებით უკეთეს საქართველოში, ერთიან, ეროვნულ და სიყვარულით სავსეში.პს.იმედი მაქვს, რომ ტექსტის სიმწირის გამო არ მიწყენთ, აღარ ვიცი მადლიერება და სიყვარული თქვენდამი როგორ გამოვხატო. დრო მოვა და პირისპირ უფრო კარგად გეტყვით ჩემს სათქმელს.შეხვედრამდე! გამარჯვებამდე!გავიმარჯვებთ სახელოვნად!" - წერია რეჟიმის ტყვის, ლუკა ჯაბუას წერილში, რომლის ფოტოს თეონა მესხი სოციალურ ქსელში ავრცელებს