„ისინი დარწმუნებულები არიან, რომ თვითმმართველობის არჩევნებში განწირულნი არიან მარცხისთვის“ - კახა კალაძე ოპოზიციაზე

თბილისის მერის განცხადებით, ოპოზიცია დარწმუნებულია, რომ თვითმმართველობის არჩევნებში არანაირი შანსი არ აქვს, ამიტომაც ამას ფუთავენ პოლიტიკური ნიშნით, რომ არ მიიღებენ მასში მონაწილეობას.

ამის შესახებ კახა კალაძემ ჟურნალისტებს შესაბამისი კითხვის საპასუხოდ განუცხადა.

„რეალურად ხდება ის, რომ ჩვენ პოლიტიკური პარტიები არ გვყავს, ოპოზიციის სახით. გვყავს რადიკალური დაჯგუფება, რომელიც უბრალოდ მითითებებს ასრულებს. მათ არც 2024 წლის არჩევნები აინტერესებდათ. აბა, თქვენ როგორ წარმოგიდგენიათ, პოლიტიკური პარტია, რომელიც იღებს არჩევნებში მონაწილეობას და აინტერესებს არჩევნები და ქვეყნის ბედი, არ გადიოდეს და არ ელაპარაკებოდეს ხალხს. ხომ წარმოუდგენელია? ნონსენსია. ისე დამთავრდა არჩევნები, სარჩევნო კამპანია არ ჩაუტარებიათ, ხალხს ვერ ხვდებოდნენ, თუმცა, ამას აქვს თავისი ახსნა და მიზეზი. ეს ადამიანები არიან უბრალოდ დავალების შემსრულებლები და მათი მთავარი ამოცანაა, როგორმე  ქვეყანაში მოახდინონ სახელმწიფო გადატრიალება, რევოლუცია, ხალხის დაპირისპირება და ასე შემდეგ, გამოიყენონ ადამიანები თავიანთი ინტერესების გასატარებლად, როგორც მოხდა რამდენიმე თვის წინ, აქციების დროს - ძალადობრივი დაჯგუფებები წინ გაუშვებდნენ ამ ახალგაზრდებს და თვითონ ხან ცხელ ჩაის სვამდნენ, ხან ყავას მიირთმევდნენ. ეს იყო რეალობა.

თვითმმართველობის არჩევნებს რაც შეეხება, ისინი დარწმუნებულები არიან, რომ განწირულები არიან მარცხისთვის, მათ არანაირი შანსი არ აქვს, რომ რომელიმე რაიონში, რომელიმე მუნიციპალიტეტში მიაღწიონ რაიმე სახის წარმატებას. ამას ფუთავენ პოლიტიკური ნიშნით, რომ არ მიიღებენ მონაწილეობას“, - განაცხადა კახა კალაძემ.

მისივე თქმით, მმართველ გუნდს თვითმმართველობის არჩევნებისთვის მზადება დაწყებული აქვს და უახლოეს მომავალში საზოგადოებას წარუდგენს ხედვას სამომავლო გეგმების შესახებ.