ვიდეო: "ტიტუშკებს" კლინიკაში შემოსვლის მცდელობა ჰქონდათ" - ნაცემი ჟურნალისტი კლინიკაში რჩება

"მთავარი არხის" ჟურნალისტი, რომელსაც "ოცნების" პროპაგანდისტები ფიზიკურად გაუსწორდნენ, ამ დრომდე კლინიკაში რჩება. გიორგი მამნიაშვილს სხეულზე მრავლობითი დაზიანებები და ტვინის შერყევა აღენიშნება.

"პირველები" დაზარალებულ ჟურნალისტს ესაუბრა, რომელიც თაბუკაშვილის ქუჩაზე მომხდარ ინციდენტს ქრონოლოგიურად იხსენებს. ამბობს, რომ მას ფონდების დაყადაღებასთან დაკავშირებით კითხვები ვატო შქარაშვილთან და გოგა ხაინდრავასთან ჰქონდა. მას შემდეგ, რაც მამნიაშვილმა პროპაგანდისტებს "მონა" უწოდა, ისინი მასზე თავდასხმაზე გადავიდნენ. მისი განმარტებით, შაქარაშვილი ჟურნალისტვისთვი ტელეფონის წართმევას ცდილობდა, რათა გადაღების საშუალება არ ჰქონოდა.

მამნიაშვილი ასევე ყვება, რომ მას შემდეგ, რაც ახალგაზრდებმა ცემის ფაქტი გააპროტესტეს, ხაინდრავას სახლთან მივიდნენ და კვერცხები ისროლეს, დილიდან კლინიკასთან "ტიტუშკები" მივიდნენ, რომლებიც ამ დრომდე ადგილზე რჩებიან.

მაქვს ტვინის შერყევა და მაქვს გარეგანი დაზიანებები და დაბეჟილობები სხეულის სხვადასხვა არეში. მთელი ღამის განმავლობაში კლინიკის გარე პერიმეტრზე ტიტუშკები იყვნენ მობილიზებულები, საავადმყოფოს ურტყამდნენ წრეებს. შიგნით შემოსვლის მცდელობა ჰქონდათ.

ვატო შაქარაშვილის კაი კაცობა კი ვიცით. თავის დროზე ფონდები მისი საჩივრის საფუძველზე დაყადაღდა და ათობით და ასობით ჯანმრთელობის პრობლემის მქონე ადამიანი დარჩა ფინანსური სახსრების გარეშე, რომელსაც ფინდი აწვდიდა, შესაბამისად, გამიჩნდა პროტესტის გრძნობა და დავუძახე "მონა", რის შემდეგაც შაქარაშვილი ფიზიკურ ძალადობაზე გადავიდა. სახეში დამარტყა დაახლოებით 5-6-ჯერ და წიხლი დამარტყა ორჯერ, - ამბობს მამნიაშვილი.
აღსანიშნავია ის ფაქტიც, რომ მაშინ, როდესაც შაქარაშვილი ჟურნალისტს სცემდა, ადგილზე იო საპატრულო პოლიციაც, თუმცა მას რეაგირება არ მოუხდენია.  გამოძიება მხოლოდ მას შემდეგ დაიწყო, რაც 112-ში ზარი თავად მამნიაშვილმა განახორციელა.

ამ დრომდე პოლიციას არც სამეთვალყურეო კამერების ჩანაწერები ამოუღია და "ოცნების" პროპაგანდისტები გამოუკითხავს.