„სამწუხაროდ, შედეგიანი არ არის ტრამპის ბრძოლა „დიპ სტეიტის“ წინააღმდეგ“ - ივანიშვილის დეპუტატი

„ქართული ოცნების“ პარლამენტის იურიდიულ საკითხთა კომიტეტის თავმჯდომარე არჩილ გორდულაძე აშშ-ის სენატის საგარეო ურთიერთობათა კომიტეტის მიერ „მეგობარი აქტის“ მიღების შემდეგ აცხადებს, რომ პრეზიდენტი დონალდ ტრამპის „ბრძოლა „დიპ სტეიტის“ წინააღმდეგ შედეგიანი ვერ არის“.
არჩილ გორდულაძემ 28 მარტს პარლამენტში ჟურნალისტებთან საუბრისას „მეგობარი აქტს“ უწოდა „მტრული აქტი საქართველოს წინააღმდეგ“ და თითქოს მისი ინიციატორია „ისევ და ისევ ის „დიპ სტეიტი“, რომელსაც აქვს ძალიან ღრმად გადგმული ფესვები“.

„ძალიან სამწუხაროა, როდესაც ბატონი ტრამპის ადმინისტრაცია აცხადებს ბრძოლას „დიპ სტეიტის“ წინააღმდეგ, ჩვენ ვხედავთ, რომ სამწუხაროდ ეს ბრძოლა ჯერჯერობით შედეგიანი ვერ არის“, - განაცხადა გორდულაძემ.

ტერმინმა „დიპ სტეიტმა“ [deep (ღრმა) state (სახელმწიფო)] დასავლურ კონტექსტში განსაკუთრებული აქტუალობა 2016 წელს აშშ-ში დონალდ ტრამპის პირველად გაპრეზიდენტების შემდეგ მოიპოვა.ამ ტერმინს ახსენებენ „ქართული ოცნების“ ლიდერებიც, რომლებმაც 2022 წლის შემდეგ განავითარეს შეთქმულების თეორია „გლობალური ომის პარტიაზე“, დონალდ ტრამპის ინაუგურაციის მოახლოებასთან ერთად კი, „გლობალური ომის პარტია“ ტერმინ „დიპ სტეიტით“ ჩაანაცვლეს, - ანალიტიკოსების თანახმად, აშშ-ის 47-ე პრეზიდენტისთვის უფრო გასაგები ფრაზით.„ჩვენ სულ ამას ვამბობთ, რომ დიპ სტეიტის დამარცხება ნიშნავს და აისახება მხოლოდ და მხოლოდ საქართველოს მაგალითზე. თუ საქართველოში გარედან ჩარევა კვლავ გაგრძელდა, მაშინ არავის ექნება შესაძლებლობა, თქვას, რომ „დიპ სტეიტი“ არის დამარცხებული“, - განაცხადა გორდულაძემ.