მწერალთა სახლმა გიორგი კალანდიას სიტყვით გამოსვლისთვის ბიუჯეტიდან 2252 ლარი გადაუხადა

ლონდონში გამართულ საქართველოს მწერალთა სახლის ღონისძიებაზე, რომელსაც ქართველმა ხელოვანებმა ბოიკოტი გამოუცხადეს, სიტყვით გამოსვლისთვის, გიორგი კალანდიას სახელმწიფო ბიუჯეტიდან 2252 ლარი გადაუხადეს. ამის შესახებ სახელმწიფო შესყიდვების სააგენტოს ვებ-გვერდიდან ხდება ცნობილი.

ირკვევა, რომ მწერალთა სახლმა, კულტურის ისტორიის მუზეუმის დირექტორთან გააფორმა კონტრაქტი, როგორც ფიზიკურ პირთან და ლონდონში ღონისძიებაზე სიტყვით გამოსვლისთვის ჰონორარი 2252 ლარი ჩაურიცხა.

ხელშეკრულებაში დაკონკრეტებული არ არის, ვინ დაფარა გიორგი კალანდიას ლონდონში ფრენის და ცხოვრების ხარჯები.

ცნობისთვის, 11 მარტს ლონდონში „ქართული ოცნების“ ხელისუფლების ღონისძიებების პარალელურად საპროტესტო აქციაც გაიმართა. ღონისძიებაზე მისულ რეჟიმის წარმომადგენლებს ემიგრანტები სინდისის პატიმრების და სპეცრაზმის მიერ ნაწამები ხალხის ფოტოებით დახვდნენ და ღონსიძიებაზე შეძახილებით შეაცილს.

ამასთან, ბრიტანელმა ქართველოლოგმა რეიფილდმა მწერალთა სახლის ჯილდოს მიღებაზე უარი თქვა.

„მე უაღრესად დამწუხრებული ვარ იმით, რაც საქართველოში ხდება და ვერ მივიღებ ვერანაირ საჩუქარს, რომელიც რაიმენაირად ასოცირდება მმართველ პარტიასთან, რომელიც ამყოფებს საქართველოს იმ მდგომარეობაში, როგორშიც ის ახლა არის“- აღნიშნა 83 წლის ბრიტანელმა ისტორიკოსმა, რომელიც  რუსული და ქართული ლიტერატურათმცოდნეა.