შეთანხმება შედგა - აშშ დაუყოვნებლივ განაახლებს დახმარებას, სადაზვერვო ინფორმაციის გაზიარებას, უკრაინა თანახმაა, 30 დღით ცეცხლი შეწყვიტოს

ამერიკა-უკრაინის დელეგაციების შეხვედრა საუდის არაბეთში დასრულდა. შეხვედრის დასრულების შემდეგ გახდა ცნობილი, რომ ამერიკა უკრაინისთვის სამხედრო დახმარებასა და სადაზვერვო ინფორმაციის გაზიარებას დაუყოვნებლივ განაახლებს.

როგორც უკრაინის პრეზიდენტის ადმინისტრაციის მიერ გავრცელებულ ინფორმაციაშია აღნიშნული, მხარეებმა მშვიდობის აღდგენის მიმართულებით მნიშვნელოვანი ნაბიჯები გადადგეს. ორივე მხარის წარმომადგენლებმა უკრაინელი ხალხის სიმამაცეს გაუსვეს ხაზი და შეთანხმდნენ, რომ დროა ხანგრძლივი მშვიდობის დამყარების პროცესი დაიწყოს.

უკრაინულმა მხარემ აშშ-ის პრეზიდენტს, კონგრესს და მოსახლეობას მხარდაჭერისთვის მადლობა გადაუხადა.

"უკრაინამ გამოთქვა მზადყოფნა მიიღოს აშშ-ის წინადადება დროებითი, 30-დღიანი ცეცხლის შეწყვეტის დაუყოვნებლივ დანერგვის შესახებ, რომელიც შეიძლება გაგრძელდეს მხარეთა ურთიერთშეთანხმებით, რუსეთის ფედერაციის მიერ ერთდროულად მიღებისა და განხორციელებით. შეერთებული შტატები აცნობებს რუსეთს, რომ რუსეთის მხრიდან ურთიერთგაგება მშვიდობის მიღწევის გასაღებია. შეერთებული შტატები დაუყოვნებლივ ხსნის სადაზვერვო ინფორმაციის გაზიარებაზე პაუზას და აღადგენს სამხედრო დახმარებას. დელეგაციებმა ასევე განიხილეს ჰუმანიტარული ძალისხმევის მნიშვნელობა, როგორც სამშვიდობო პროცესის ნაწილი, განსაკუთრებით ზემოაღნიშნული ცეცხლის შეწყვეტის დროს, მათ შორის სამხედრო ტყვეების გაცვლა, დაკავებული მშვიდობიანი მოსახლეობის გათავისუფლება და იძულებით გადაადგილებული უკრაინელი ბავშვების დაბრუნება.

ორივე დელეგაცია შეთანხმდა, რომ განესაზღვრათ მათი გუნდების შემადგენლობა და დაუყოვნებლივ დაიწყონ მოლაპარაკებები მდგრადი მშვიდობის მისაღწევად, რომელიც უზრუნველყოფს უკრაინის გრძელვადიან უსაფრთხოებას. შეერთებული შტატები ვალდებულია განიხილოს ეს კონკრეტული წინადადებები რუსეთის წარმომადგენლებთან. უკრაინის დელეგაციამ კიდევ ერთხელ აღნიშნა, რომ სამშვიდობო პროცესში ევროპელი პარტნიორები უნდა იყვნენ ჩართულნი. საბოლოოდ, ქვეყნის პრეზიდენტები შეთანხმდნენ იმაზე, რომ მინერალების შესახებ შეთანხმებას რაც შეიძლება მალე უნდა მოწეროს ხელი", - ნათქვამია განცხადებაში.