9 აპრილიდან 9 აპრილამდე - პოლიტიკური პარტიის "ჩვენ" განცხადება

9 აპრილი - ეს თარიღი ჩვენი ეროვნული მეხსიერებისთვის უკვდავია: 1989 წლის 9 აპრილს, საბჭოთა ოკუპაციის წინააღმდეგ მშვიდობიანად მებრძოლმა ქართველმა ახალგაზრდებმა თავისუფლების ისტორია საკუთარი სისხლით დაწერეს. რუსულმა სამხედრო ბატონობამ ღირსეული, თავისუფალი და დემოკრატიული სახელმწიფოსკენ ხალხის სწრაფვა ვერ ჩაახშო!

იმ დღეს, 1989 წლის 9 აპრილს, ჩვენმა ერმა აირჩია თავისუფლების გზა - ტკივილიანი, სისხლიანი, მაგრამ ღირსეული გზა!

ორი წლის შემდეგ, სწორედ ამავე დღეს, 1991 წლის 9 აპრილს, საქართველოს რესპუბლიკამ გამოაცხადა დამოუკიდებლობა. ეს იყო ჩვენი ბრძოლის ლოგიკური და სამართლიანი შედეგი - საქართველოს დამოუკიდებლობა ხალხის ნება იყო, რომელიც დაიბადა ტანჯვით, ტკივილით და ერთიანობით.

დამოუკიდებლობა იმ რთული გზის მხოლოდ დასაწყისი იყო, რომელსაც დემოკრატია ჰქვია. დემოკრატია ნიშნავს ხალხის ძალაუფლებას, კანონის წინაშე თანასწორობას, არჩევანის თავისუფლებას, სამართლიან არჩევნებს, განსხვავებული აზრის პატივისცემას და სიტყვის თავისუფლებას.

სწორედ ეს ფასეულობები აკავშირებს საქართველოს ევროპასთან, თავის ისტორიულ ადგილთან - ევროპულ ცივილიზაციასთან.

2025 წლის 9 აპრილს, საქართველო არ დგას იქ, სადაც უნდა იდგეს - ჩვენი დემოკრატია კითხვის ნიშნის ქვეშაა. ე.წ. ხელისუფლება, რომელიც დიდი ხანია, აღარ ასახავს ხალხის ნებას, ცდილობს ერთპარტიული რეჟიმის დამყარებას. ხალხის ხმა აღარ ისმის. ციხეები სინდისის პატიმრებითაა სავსე, განსხვავებული აზრი იდევნება, სასამართლო არაა დამოუკიდებელი, და ე.წ. ხელისუფლება უცხოური, კერძოდ, რუსული გავლენების სამსახურშია.

ჩვენი ევროპული გზა საფრთხეშია - საფრთხეშია თავისუფლების იდეა, რომელზეც 1991 წლის 9 აპრილს ახალი ქართული სახელმწიფო დაფუძნდა!

საქართველოს ისტორია გვასწავლის - ბრძოლა არ მთავრდება, ბრძოლას ყოველთვის აქვს აზრი!

თავისუფლებისთვის ბრძოლა არ წყდება მაშინაც კი, როცა ირგვლივ სიბნელეა და ჩვენ, პოლიტიკური პარტიას "ჩვენ", გვჯერა, რომ სწორედ ახლაა დრო ერთობის, სოლიდარობის, ბრძოლისა და სინათლის დაბრუნების!

ჩვენ მოვუწოდებთ "ქართული ოცნების" თვითგამოცხადებულ ხელისუფლებას :

✅ დაუყოვნებლივ გათავისუფლოს ყველა სინდისის პატიმარი!

✅ გადადგეს "ქართული ოცნების" მთავრობა, რომელიც უკანონოდ და ბოროტად იყენებს ხელისუფლებას!

✅ ჩატარდეს ახალი, თავისუფალი და სამართლიანი არჩევნები საერთაშორისო ზედამხედველობითა და პოლიტიკური თანხმობით!

9 აპრილი გვახსენებს, რომ ეროვნული ღირსება არ იყიდება და თავისუფლებისთვის ბრძოლა მარადიულია! თანამედროვე სამოქალაქო საზოგადოებას არ აქვს ფუფუნება, იყოს პასიური. დღეს, ისე როგორც არასდროს, საჭიროა ერთობა, სოლიდარობა და მოქმედება.

პარტია "ჩვენ" დგას საქართველოს დამოუკიდებლობის, დემოკრატიისა და ევროპული მომავლის დაცვის წინა ხაზზე!

ჩვენ ვიბრძვით ყველა ქართველის ღირსეული მომავლისთვის - იმისთვის, რასაც თავი შესწირეს 1989 წლის 9 აპრილს ჩვენმა გმირებმა და რაც კანონიერ მოცემულობად გამოაცხადა თავისუფალმა საქართველომ 1991 წლის 9 აპრილს.

ბრძოლა გრძელდება!

ჩვენ ერთად უნდა გავიმარჯვოთ!

ჩვენი ძალა მრავალფეროვნებაშია!

პოლიტიკური პარტია "ჩვენ"

9 აპრილი, 2025 წელი, ქ. თბილისი