ივანიშვილის პარლამენტში ოპოზიციური პარტიების აკრძალვას I მოსმენით მხარი დაუჭირეს

ივანიშვილის პარლამენტში ოპოზიციური პარტიების აკრძალვას I მოსმენით მხარი დაუჭირეს.

კანონპროექტი ბიუროზე პირველად 31 მარტს დარეგისტრირდა.

აღნიშნულს წინ უსწრებდა მამუკა მდინარაძის განცხადება, რომ "ენმ-ს მემკვიდრე პარტიების არაკონსტიტუციურად აღიარების კანონპროექტი" წარადგინეს.

კერძოდ, საკონსტიტუციო სასამართლოს შეეძლება „აკრძალოს პარტია, რომლის გაცხადებული მიზანი ან/და საქმიანობის არსი (მათ შორის, პერსონალური ან/და შესაბამის საარჩევნო კომისიაში წარდგენილი პარტიული სიის შემადგენლობა) არსებითად იმეორებს საქართველოს საკონსტიტუციო სასამართლოს მიერ აკრძალული პარტიის გაცხადებულ მიზანს ან/და საქმიანობის არსს (მათ შორის, პერსონალურ შემადგენლობას).

კანონპროექტის განმარტებით ბარათში ნათქვამია, რომ პოლიტიკური პარტიის შექმნა და საქმიანობა აბსოლუტური უფლება არ არის და „სახელმწიფო უფლებამოსილია შეზღუდოს მოცემული ძირითადი უფლებები, თუ მათი გამოვლინება საფრთხეს უქმნის სახელმწიფოსა და დემოკრატიის ინტერესებს“.

ამასთან, „საკონსტიტუციო სასამართლოს ექნება შესაძლებლობა, განახორციელოს ეფექტიანი საკონსტიტუციო კონტროლი პოლიტიკური პარტიებზე, რომელთა მიზანია საქართველოს კონსტიტუციური წყობილების დამხობა ან ძალადობით შეცვლა, ქვეყნის დამოუკიდებლობის ხელყოფა, ტერიტორიული მთლიანობის დარღვევა ან რომელიც ეწევა ომის ან ძალადობის პროპაგანდას, აღვივებს ეროვნულ, ეთნიკურ, კუთხურ, რელიგიურ ან სოციალურ შუღლს. შესაბამისად, იმ პირებს, რომლებსაც აქვთ სურვილი კვლავ ზემოაღნიშნული პარტიების არსებითად მსგავსი ახალი პარტიები დააფუძნონ და კვლავ განაგრძონ არაკონსტიტუციური საქმიანობა, სასამართლო წესით აეკრძალებათ ასეთი ფიქციური პარტიების მეშვეობით მოქმედება“ -  ნათქვამია განმარტებით ბარათში.

შეგახსენებთ, რომ ჯერ კიდევ წინასაარჩევნოდ გაცხადებული ზემოაღნიშნული ცვლილება „ქართულ ოცნებას“ შემოაქვს იმ ფონზე, როცა ივანიშვილის გუნდს გადაწყვეტილი აქვს, არაკონსტიტუციურად გამოაცხადოს „ნაციონალური მოძრაობა“ და ყველა ოპოზიციური პარტია, ვისაც ამ პარტიის მემკვიდრედ ჩათვლის. დაგეგმილი საკანონმდებლო ცვლილებებით, არაკონსტიტუციურად გამოცხადებული პარტიების წარმომადგენლებს ასევე აეკრძალებათ ახალი პარტიის შექმნასაც.