დაფიქსირდა უცნობი დაავადების გავრცელება სიკვდილიანობის მაღალი მაჩვენებლით და სიკვდილის სწრაფად დადგომით

კონგოს დემოკრატიულ რესპუბლიკაში დაფიქსირდა უცნობი დაავადების გავრცელება სიკვდილიანობის მაღალი მაჩვენებლით და სიკვდილის სწრაფად დადგომით. - ამის შესახებ ჯანდაცვის მსოფლიო ორგანიზაციის საგანგებო ბიულეტენშია ნათქვამი.
დაავადების პირველი მსხვერპლი სამი ბავშვი იყო, რომლებმაც მკვდარი ღამურა შეჭამეს და ორ დღეში დაიღუპნენ. დღეისათვის, დაფიქსირდა დაავადების ორი აფეთქება: ბოლომბას რაიონში და მეზობლად მდებარე ბასანკუსუში. 15 თებერვლის მონაცემებით, ამ ორ რაიონში დაფიქსირდა 431 შემთხვევა და 53 გარდაცვალება. ამასთან, ბოლომბაში სიკვდილიანობა 12,3%-ია, მეზობელ რაიონში, სადაც მხოლოდ 12 შემთხვევაა, - 66,7%.
გარდაცვლილთა თითქმის ნახევარი (48.9%) პირველი სიმპტომების გამოვლენიდან 48 საათში აღესრულა. ეს სიმპტომებია: მაღალი ცხელება, ღებინება, დიარეა, მუცლის ტკივილი, სისხლდენა ცხვირიდან, კუჭიდან და თვალებიდან და მდგომარეობის სწრაფი გაუარესება.
"ჰემორაგიული ცხელების" შემთხვევები ჩვეულებრივ ასოცირდება ცნობილ მომაკვდინებელ ვირუსებთან, როგორიცაა ებოლა, დენგო, მარბურგი და ყვითელი ცხელება, მაგრამ ათზე მეტი ნიმუშის ტესტების საფუძველზე, მკვლევარებმა ისინი გამორიცხეს.
ახლა სპეციალისტები სხვა ანალიზებს ატარებენ, მათ შორის, მეტაგენომიურს. ინფექციის წყარო (მიუხედავად იმისა, რომ ვიღაცებმა თაგვი შეჭამეს) და ეპიდემიოლოგიური კავშირი ამ ორ ეპიდემიას შორის, ჯერ არ არის დადგენილი. პანიკის თავიდან ასაცილებლად, ექსპერტები ჩქარობენ. მათი თქმით, ადგილობრივი ეპიდემიები მაღალი სიკვდილიანობის მაჩვენებლით, იშვიათად ხდება პანდემია.
„ახალი“ დაავადებების 80% რეგიონალურად რჩება და ამის მაგალითია ებოლას ცხელება.
შეგახსენებთ, ცოტა ხნის წინ, ჩინეთში ღამურებში აღმოაჩინეს ახალი კორონავირუსი, რომელიც პოტენციურად საშიშია ადამიანისთვის.

„რადიო თბილისი“