"ქართველი მესაზღვრეები კარგად შეგვხვდენენ... არ გვინდა, ომში ვიღუპებოდეთ" - რა ხდება რუსეთ-საქართველოს საზღვართან

რუსეთ-საქართველოს საზღვარზე ისევ რამდენიმე კილომეტრიანი საცობია. Gooogle Map-ის მიხედვით, ლარსის საბაჟო-გამშვებ პუნქტთან 14-კილომეტრიანი საავტომობილო რიგია.

ლარსის სასაზღვრო გამშვებ პუნქტთან გადმოსული რუსეთის მოქალაქეები აცხადებენ, რომ რუსეთის ტერიტორიის დატოვება შეფერხებით ხდება. მებაჟეებს კითხვები აქვთ სამხედრო სამსახურის გავლასთან დაკავშირებით. მეორე მხრივ კი ამბობენ, რომ ქართველი მებაჟეები არანაირ ბარიერს არ უქმნიან და საქართველოში უპრობლემოდ უშვებენ.

"ჩვენ ქართველი მესაზღვრეები ძალიან კარგად შეგვხვდენენ და მადლობელი ვართ საქართველოსი, რომ მოგცეს საშუალება შემოვიდეთ საქართველოში და აქედან გავაგრძელოთ გზა. ჩვენ გვინდა, რომ ვარჩინოთ ოჯახები, გვქონდეს მიზნები ცხოვრებაშუი და არ გვინდა, რომ ვიღუპებოდეთ ომში, რომელიც ახალმა საბჭოთა ლიდერმა წამოიწყო".

ყველა, ვინც რუსეთიდან გამორბის, ამბობს, რომ ომში ჩართვა არ სურთ. მათი ნაწილი ამბობს, რომ საქართველოს ე,წ. ტრანზიტ ქვეყანად გამოიყენებენ და შეეცდებიან, რომ სხვა ქვეყანაში გადავიდნენ.

"არ მინდა, რომ მობილიზაცია მომიწიოს. არ მჯერა რუსეთის ხელისუფლების, სულ იტყუებიენ. ამბობენ, რომ არ იქნება მობილიზაცია, მერე უცებ აცხადებენ, არ ვენდობი. მე ვმოგზაურობ, მერე თურქეთში წავალ დასასვენებლად."

"დიდი რიგებია და დიდი ხანი ვუნდებით შემოსვლას. სპეციალურად ვიყიდე სკუტერი, რომ შემოვსულიყავი, მაგრამ დღეს თქვეს, რომ სკუტერებით აღარ უშვებენ და გადაგდება მომიწია. რუსეთის მხარეს დიდი რიგებია. ბევრი გამორბის."

"ჩვენ გვინდა, რომ წვლილი შევიტანოთ საქართველოს ეკონომიკის განვითარებაში. ამ ქვეყანაში ვიხადოთ გადასახადები და ხალხის ვცხოვრება უკეთესი გავხადოთ. ძალიან მოგვწონს საქართველო. კარგი ქვეყანაა"

ცნობისთვის, ჯერჯერობით უცნობია ზუსტად რამდენმა მოქალაქემ გადმოკვეთა საზღვარი რუსეთში მობილიზაციის გამოცხადების შემდეგ. რუსულ მედიაში ვრცელდება ინფორმაცია, რომ ორშაბათიდან რუსეთი თავისი მოქალაქეების გადაადგილებას აკრძალავს.